Tékniku EDTL halo instalasaun ba liña distribuisaun eletrisidade iha Dili, kinta (04/03). Imajen TATOLI/António Gonçalves

DILI, 29 juñu 2021 (TATOLI)Eletricidade de Timor-Leste, Empreza Públika (EDTL, E.P) daudaun ne’e hahú prepara dokumentu sira atu deside modelu aprovizionamentu sosa kontadór pre-pagu hamutuk 85.000, ho kustu millaun $3 resin, iha tinan ne’e hodi redús konesaun ilegál.

“Ami prepara ona dokumentu sira atu lansa iha semana oin. Nune’e, aban Konsellu Administrasaun sei halo deliberasaun hodi deside modelu aprovizionamentu,” Prezidente EDTL, E.P, Paulo da Silva, informa ba Agência TATOLI, iha resintu Ministériu Finansa (MF), Aitarak-laran, tersa ne’e.

Nune’e, tékniku sira prepara haree modelu atu sosa kontadór ne’e liuhosi konkursu públiku ou EDTL,E.P mak sei sosa rasik hodi bele poupa osan.

Maski nune’e, tuir Dirijente ne’e, daudaun tékniku sira sei haree hela opsaun ba aprovizionamentu liuhosi dokumentu sira, nune’e kuarta (30/06) Konsellu Administrasaun bele deside.

“Ita-nia planu atu sosa mínimu kontadór hamutuk 85.000, maibé posibilidade sei liu ida ne’e tanba ita iha nesesidade duni atu instala ba uma-kain sira ne’ebé atu hetan instalasaun eletrisidade foun,” nia akresenta.

Notísia relevante: EDTL,E.P sei sosa kontadór pre-pagu 85.000 hodi redús konesaun ilegál

Planu sosa kontadór tanba nota katak daudaun ne’e konsumidór barak mak halo konesaun ilegál tanba seidauk iha kontadór atubele monta ba uma-kain sira ne’ebé seidauk asesu.

Iha tinan 2019, tuir lista EDTL hatudu uma-kain ne’ebé dada eletrisidade ilegál hamutuk 30.000 tanba laiha kontadór pre-pagu.

Entretantu, kliente ne’ebé uza ona kontadór pre-pagu hamutuk 150.000, maibé iha ona instalasaun pre-pagu kontadór hamutuk 120.000 no seidauk iha hamutuk 30.000.

Notísia relevante: Kliente EDTL 30.000 Dada Eletrisidade Ilegál Tanba Seidauk Iha Kontadór Pre-Pagu

Bazeia ba lei númeru 33/2016, 16 agostu, kona-ba tarifa EDTL inklui koima sira, katak kliente hotu bainhira uza enerjia eletrisidade tenke selu ka sosa pre-pagu.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here