Traballadór EDTL halo instalasaun eletrisidade iha área Comoro, kinta (04/03). Imajen TATOLI/António Gonçalves

DILI, 10 maiu 2021 (TATOLI)-Eletrisidade de Timor-Leste, Empreza Públika (EDTL,E.P) sei sosa kontadór pre-pagu hamutuk 85.000 ho kustu millaun $3-resin iha tinan 2021 hodi redús konesaun ilegál.

Prezidente Konsellu Administrasaun EDTL,E.P, Paulo da Silva, nota katak daudaun konsumidór barak mak halo koneksaun ilegál, maibé ekipa inspesaun seidauk tuun ba terrenu tanba situasaun Serka Sanitária liga ho COVID-19.

“Ita iha tinan ne’e sei sosa kontadór pre-pagu hamutuk unidade 85.000 atu monta ba uma-kain ne’ebé seidauk iha no ba sira ne’ebé dada ahi ilegál. Ita sei haree bainhira Serka Sanitária hotu ona, iha planu ona atu ekipa inspesaun halo operasaun ba konsumidór ne’ebé halo ligasaun ilegál,” Prezidente EDTL  informa iha salaun Hotel Novo Turismo, Lecidere, Dili, segunda ne’e.

Tuir Dirijente ne’e, hafoin sosa kontadór pre-pagu eletrisidade, obrigatóriamente sei monta ba uma-kain ne’ebé seidauk iha no sira ne’ebé dada ahi ilegál.

Polítika Governu maka atu labele halo diskriminasaun ba konsumidór sira no hasa’e reseita Estadu liuhosi sidadaun hotu sosa pre-pagu.

“Orsamentu ba kontadór pre-pagu ne’e hamutuk  millaun $3-resin, ne’ebé ita hahú prepara ona atu halo konkursu públiku ba akizisaun,” nia hatutan.

Tuir lista hosi EDTL,E.P, iha tinan 2019 hatudu uma-kain ne’ebé dada eletrisidade ilegál hamutuk 30.000 tanba laiha kontadór pre-pagu.

Entretantu, kliente ne’ebé uza ona kontadór pre-pagu hamutuk 150.000, maibé ida iha ona instalasaun pre-pagu kontadór hamutuk 120.000 no 30.000 seidauk iha.

Bazeia ba lei númeru 33/2016, 16 agostu, ko’alia kona-ba tarifa EDTL inklui koima sira, katak kliente hotu bainhira uza enerjia eletrisidade tenke selu ka sosa pre-pagu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here