Ministru Obra Públika, Salvador Eugénio Soares dos Reis Pires. Imajen TATOLI/António Gonçalves

DILI, (TATOLI) – Ministru Obra Públika, Salvador Eugénio Soares dos Reis Pires, fó sai lista kliente Eletrisidade Timor-Leste (EDTL) ne’ebé mak dada eletrisidade ilegál kuaze 30.000 tanba seidauk iha kontadór pre-pagu.

“Kona-ba lista kliente dada ahi ilegál, pur-volta 30.000 koneksaun durante impase tanba laiha kontadór pre-pagu atu halo instalasaun”, katak nia ba deputadu sira iha plenária tersa ne’e.

Governante ne’e dehan tinan ne’e ninia ministériu aloka ona verba atu iha tempu badak sei halo anúnsiu públiku atu halo akizisaun ba kontadór pre-pagu.

Hodi hatutan dadus kliente kontadór pre-pagu nia hamutuk 150.000, ida iha ona instalasaun prepagu kontadór 120.000 no 30.000 seidauk iha.

Nia mós akresenta iha tarefa EDTL lei númeru 33/2016 16 agostu ko’alia kona-ba koima sira, katak kliente hotu bainhira uza enerjia eletrisidade tenke selu.

“Tempu badak ami sei haree fali lista, hafoin Tribunál das Contas (TdC) mak toma konta, liu-liu ba instituisaun públika sira atu halo pagamentu ba uza enerjia eletrisidade, ne’ebé sai dívida no sira seidauk selu”, katak.

Antes ne’e iha Orsamentu Jerál Estadu (OJE) 2019, Governu prevee ona osan ho montante $750.000 hodi sosa transformadór tolu no mákina kontadór pre-pagu hamutuk unidade 30.000.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here