Aeródromu Militár Baucau. Imajen/Wiki

DILI, 13 novembru 2020 (TATOLI)Governu Timor-Leste (TL) sei selebra akordu asisténsia gratuita ho Governu Estadu Unidu Amérika (EUA) ba projetu reabilitasaun hamutuk aeródromu militár iha munisípiu Baucau.

Tanba ne’e, liuhosi reuniaun Konsellu Ministru (KM) iha sesta ne’e, atribui podér tomak ba Vise Primeiru-Ministru no Ministru Planu no Ordenamentu, José Maria dos Reis, reprezenta Governu asina akordu ho EUA.

“Hafoin koordenasaun ho ministériu relevante sira, prosede asinatura akordu asisténsia gratuita entre Governu rua,” Ministru Prezidénsia Konsellu Ministru, Fidelis Manuel Leite Magalhães, informa hafoin reuniaun ezekutivu iha Palásiu Governu, sesta ne’e.

Ministru José Maria mós sei lidera ekipa ne’ebé sei halo konsertasaun detallu kona-ba aeroportu sira hotu.

Maske nune’e, Portavóz Governu ne’e seidauk fó sai bainhira maka realiza selebrasaun akordu.

Fundu ba projetu konstrusaun aeródromu ne’e hamutuk millaun $10, ne’ebé hetan aprovasaun ona husi Governu EUA.

Projetu ne’e sei hahú husi prosesu konstrusaun moru aeroportu, hadi’a hangar (aviaun nia para fatin), inklui konstrusaun no apoiu ekipamentu ba ekipa Bombeiru no apoia aviaun ida ba Komandu FALINTIL-Forsa Defeza Timor-Leste (F-FDTL).

Bainhira konstrusaun ne’e hahú, sei envolve ekipa enjeñaria husi Forsa Amerika inklui Forsa enjeñaria F-FDTL nian.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here