DILI, 25 marsu 2021 (TATOLI)—Tuir planu Estadu Unidu Amérika (EUA) sei apoia Timor-Leste hodi halo reabilitasaun ba Aeroportu Baucau ho totál orsamentu millaun $10.
Embaixadór EUA iha Timor-Leste, Charles Kevin Blackstone, hateten EUA laiha intensaun atu uza aeroportu ne’e iha futuru.
“Atu halo loos informasaun balun ne’ebé mak fó sai hodi populasaun sira preokupa katak Amérika fó apoiu reabilita aeroportu iha intensaun, maibé atu dehan loloos katak EUA laiha planu ida ba futuru atu uzu Aeroportu Baucau,” Reprezentante EUA dehan hafoin hasoru malu ho Primeiru-Ministru, Taur Matan Ruak, iha Palásiu Governu, kinta ne’e.
Enkontru ho Xefe Governu ne’e ba dahuluk, hafoin Embaixadór foun ne’e entrega karta kredensiál ba Prezidente Repúblika, Francisco Guterres ‘Lú Olo’, iha loron hirak liubá.
Notísia relevante: Prezidente Repúblika simu karta kredensiál hosi nasaun rua
Tuir Diplomata ne’e, kampu aviasaun Baucau ne’e pretense ba Timor-Leste, tanba ne’e kualker desizaun iha futuru kona-ba utilizasaun aeroportu hanesan dezisaun Governu Timor-Leste.
“Programa ne’e parte ida hosi programa asisténsia ne’ebé EUA fó ba nasaun sira ne’ebé presiza ajuda, ninia asisténsia iha ámbitu kooperasaun bilaterál,” nia akresenta.
Embaixadór Charles haktuir, iha tinan 2018, Timor-Leste hato’o pedidu ba EUA atu halo reabilitasaun ba pista aeroportu Baucau no momentu ne’ebá iha diálogu bilaterál iha área defeza iha Hawai no iha tenpu hanesan aprova Timor-Leste nia pedidu ne’e.
“Entaun ida hosi ha’u-nia prioridade sira iha Timor-Leste ne’e maka atu finaliza negosiasaun kona-ba dokumentu ne’ebé sei aprova hodi implementa ona projetu reabilitasaun ne’e, osan ne’ebé ami apoiu hamutuk millaun $10,” nia hatutan.
Aleinde reabilita aeroportu, EUA mós apoia harii armezen ida hodi tau karreta bombeiru, nune’e mós sei apoia aviaun Cesna ida atu nune’e Timor-Leste bele uza halo patrullamentu iha área marítima.
“Programa asisténsia ida-ne’e halo iha ámbitu kooperasaun sinkroniza, ho apoiu ró patrullamentu ne’ebé apoiu hosi Austrália no programa rua ne’e iha relasaun ba malu,” nia tenikz
Jornalista: Antónia Gusmão
Editora: Julia Chatarina
