Komisaun A halo debate ba alterasaun lei pakote eleitorál tolu iha Aileu. Imajen Tatoli/Evaristo Soares Martins.

AILEU, 24 juñu 2021 (TATOLI)—Komisaun A ne’ebé trata asuntu Konstitusionál no Justisa, kinta ne’e altera ona artigu 13 hosi lei resensiamentu eleitorál iha faze espesialidade.

Governu propoin altera artigu hamutuk 13 hahú hosi artigu 12, 13, 15, 16, 17, 22, 23, 26, 29, 30, 34, 36 no 51 hosi lei resensiamentu eleitorál númeru 6/2016, 25 maiu.

Proposta-alterasaun artigu hirak ne’e hosi lei resensiamentu eleitorál alterada ho rezultadu votasaun a-favór 8, laiha kontra no laiha abstensaun.

“Ho aprovasaun ne’e ita altera ona artigu hamutuk 13 hosi lei resensiamentu eleitorál iha espesialidade,” Prezidente Komisaun A, Deputadu Joaquim dos Santos, informa iha salaun Mukit, suku Aissirimou, Aileu.

Iha redasaun atuál artigu 12 (Jestaun no fiskalizasaun ba Baze Dadus no Resensiamentu Eleitorál (BDRE) númeru 3 dezigna Komisaun Nasionál Eleisaun (CNE-igla portugés) nia kompeténsia mak akompaña no fiskaliza, maibé proposta alterasaun troka de’it liafuan ‘fiskaliza’ ba ‘superviziona’.

Iha redasaun atuál artigu 13 (Konteúdo BDRE no ficheiros eleitór sira) define kona-ba númeru no identifikasaun dokumentu inskrisaun iha resensiamentu eleitorál no asuntu relevante sira sira seluk. Iha alterasaun ne’e aumenta tán númeru kontaktu eleitór sira, númeru eleitór no dadus biométriku eleitorál bainhira realiza resensiamentu eleitorál.

Iha redasaun atuál artigu 15 (kruzamentu dadus) hateten operasaun kruzamentu ho baze dadus iha Ministériu Justisa, Ministériu Solidariedade Sosiál no Ministériu Negósiu Estranjeiru no Kooperasaun. Iha alterasaun aumenta tán Ministériu Finansa.

Iha redasaun atuál artigu 16 (direitu informasaun no asesu ba dadus sira) númeru 5 hateten CNE no partidu polítiku sira simu lista eleitór sira hosi STAE ho atualizada. Iha alterasaun mensiona CNE no partidu polítiku sira simu lista eleitór sira hosi STAE ho totál númeru eleitorál sira ho atualizada. Aumenta tán liafuan ‘totál númeru eleitorál’.

Iha redasaun atuál artigu 17 (Komunikasaun ba dadus sira), hateten Diretór Jerál STAE autoriza dadus komunikasaun sira konsta ba BDRE no serbisu seguransa ka serbisu no organizmu administrasaun públika, kuandu identifika no sempre hato’o indispensável ba prosekusaun atribuisaun serbisu rekizitante no importante mak labele kontradiz (inkompatível) ho finalidade ne’ebé determina eskolla.

Iha alterasaun hateten Diretór Jerál STAE autoriza dadus komunikasaun sira konsta iha BDRE ba insituisaun bankária finanseira no telekomunikasaun devidamente lisensiada iha territóriu nasionál ho efeitu verifikasaun ba identidade, rezidénsia, inskrisaun iha BDRE no númeru kartaun eleitór hotu-hotu, iha ambitu operasaun no prosedimentu kontrolu internu ba identifikasaun kliente, prevensaun brankeamentu kapitál no finansiamentu terrorizmu.

Lei Atuál artigu 22 (períodu realizasaun operasaun), hateten alterasaun no eliminasaun ba inskrisaun ho efeitu atualizasaun resensiamentu, decorrem a todo tempo, sein prejuízu ba períodu inalterabilidade previsu iha prezente diploma. Iha alterasaun previstu prazu resensiamentu eleitorál iha estranjeiru, períodu ba atualizasaun dadus durante períodu eleitorál no respetivu kalendáriu implementasaun sei define ho diploma Governu.

Lei vijente artigu 23 (promosaun inskrisaun) númeru 1 hateten inskrisaun iha resensiamentu halo promosaun eleitór liuhosi aprezentasaun orijinál ka kópia autentikada (auténtika) billete identidade RDTL nian, sertidaun nasimentu, setidaun batizmu ka sédula pesoál hosi komunidade Islámika.

Iha alterasaun ba inskrisaun resensiamentu eleitorál promove hosi eleitór liuhosi aprezentasaun orijinál  ka kópia autentikada billete identidade RDTL nian, pasaporte ka sertidaun nasimentu RDTL nian.

Lei vijente artigu 26 (teór/teor inskrisaun), dehan inskrisaun ne’e feita liuhosi prenximentu integrál hosi kampu infrasaun formuláriu, maibé alterasaun aumenta liafuan númeru dokumentu ba inskrisaun iha resensiamentu eleitorál.

Lei atuál artigu 29 (kartaun eleitór)  alínea d hateten,  númeru inskrisaun eleitór iha resensiamentu. Alterasaun previstu númeru no tipu dokumentu ne’ebé utiliza hosi eleitór iha resensiamentu.

Lei atuál artigu 30 (alterasaun identifikasaun) númeru 2 hateten, iha kazu ne’ebé previstu iha númeru anteriór, númeru inskrisaun eleitór nian labele altera. Iha alterasaun dezigna katak iha kazu ne’ebé previstu iha númeru anteriór, númeru eleitór nian labele altera. Hasai liafuan ‘inskrisaun’.

Lei vijente artigu 34 (eliminasaun ofisioza inskrisaun) mantein, maibé aumenta tán alíneia ida kona-ba inskrisaun ba  eleitór sira uza ho dokumentu hodi halo promosaun ne’ebé deklara inválidu hosi órgaun judisiáriu.

Lei vijente 36 (inskrisaun múltiplas) mantein redasaun atuál maibé aumenta tán alínea ida kona-ba entidade relevante sira hotu presta kolaborasaun ba STAE hodi deteta inskrisaun múltiplas.

Lei vijente artigu 51 hateten, fornesimentu dokumentu hotu-hotu no formuláriu relasionadu sira ho resensiamentu eleitorál ne’e izentu pagamentu ba kualkér taxa. Iha alterasaun aumenta tán fatin pagamentu ba taxa sira-ne’ebé suporta hosi sidadaun, ba akizisaun formuláriu no dokumentu, ho valór ne’ebé sei define hosi diploma Governu nian.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here