Deputadu Joaquim Dos Santos, Imajen Tatoli/Antonio Goncalves.

AILEU, 23 juñu 2021 (TATOLI)—Komisaun A ne’ebé trata asuntu Konsitusionál no Justisa, kuarta ne’e altera ona lei órgaun administrasaun eleitorál iha faze espesialidade.

Diskusaun ba lei administrasaun eleitorál ne’e aprovadu iha faze espesialidade ho rezultadu votasaun a-favór 8, laiha kontra no abstensaun.

Notísia Relevante: Komisaun A hahú debate lei eleitorál tolu iha Aileu

“Ohin ita altera ona lei órgaun administrasaun eleitorál iha espesialidade,” Prezidente Komisaun A, Deputadu Joaquim dos Santos, informa iha debate proposta-alterasaun ba lei órgaun administrasaun eleitorál iha faze espesialidade, iha salaun Mukit, suku Aissirimou, Aileu, kuarta ne’e.

Proposta-alterasaun ba lei órgaun administrasaun eleitorál komposta hosi alterasaun hamutuk artigu lima (5), komposta hosi artigu 1 (objetu) ne’ebé konsta iha alterasaun dahuluk ba lei númeru 5/2006, 28 dezembru.

Nune’e mós artigu 2 (alterasaun lei númeru 5/2006, 28 dezembru) kona-ba objetu alterasaun), artigu 3 (normativu revogatória) ne’ebé propoin revoga artigu 14 hosi lei refere, artigu 4 ne’ebé determina re-publikasaun iha lei refere, ho alterasaun introduzida hosi prezente lei nesesária kona-ba korresaun gramátika no lejístika no artigu artigu 5 kona-ba entrada ein-vigór.

Artigu 2 hosi lei ne’e propoin altera artigu sira hosi lei númeru 5/2006, 28 dezembru mak hanesan artigu 8, 12, 14 no 15.

Lei vijente hosi artigu 2 (kompeténsia) ne’e previstu CNE nian kona-ba superviziona aktu eleitorál, promove aktu eleitorál ba sidadaun sira liuhosi meiu komunikasaun sosiál, maibé iha proposta alterasaun ne’e promove koordenasaun serbisu entre STAE ho CNE kona-ba aktu eleitorál liuhosi meiu komunikasaun sosiál. Justifikasaun sumária ka razaun hosi alterasaun ne’e atu órgaun eleitorál rua ne’e hametin koordenasaun serbisu hodi halo eleisaun prezidensiál no parlamentár.

Redasaun lei vijente iha artigu 12 (natureza, kompozisaun no kompeténsia) define kompeténsia STAE nian ho define ho lei, sub tutela no superientendénsia indireita estadu nian, ho orsamentu própriu no autonomia téknika no administrativa. Iha alterasaun define estrutura, organizasaun, kompozisaun, kompeténsia no funsionamentu STAE sub-tutela no superientendénsia ba Governu, define ho lei. Justifikasaun sumária ka razaun hosi alterasaun ne’e tanba durante ne’e STAE laiha autonomia téknika no administrativa.

Lei vijente artigu 14 (primeira nomeasaun ka eleisaun ba membru CNE) define indikasaun eleisaun ba membru CNE ho fatin no prazu durante loron 15 konta ho data publikasaun iha Jornál Repúblika. Alterasaun revogadu. Justifikasaun sumária ka razaun hosi alterasaun ne’e revoga.

Lei vijente iha artigu 15 (subsídiu estraordinária), define membru CNE sira komposta hosi dirijente sira, xefia sira, funsionáriu sira no ajente administrasaun públika ne’ebé dezempeña funsaun órgaun administrasaun eleitorál, iha ámbitu organizasaun, kondusaun ka supervizaun prosesu eleitorál ka referendáriu iha direitu, entre data publikasaun dekretu-prezidensiál ne’ebé konvoka aktu eleitorál. Maibé iha proposta-alterasaun previstu subsídiu estraordináriu kuja presupostu no valór fixa ho dekretu-lei.

Justifikasaun sumária ka razaun hosi alterasaun ne’e tanba subsídiu estraordinária sufisiente ho dekretu-lei.

Lei númeru 5/2006, 28 dezembru, altera hosi lei númeru 6/2011, 22 juñu, no lei númeru 7/2016, 8 juñu, ne’ebé konsagra Komisaun Nasionál Eleisaun (CNE-sigla portugés) no Sekretariadu Tékniku Administrasaun Eleitorál nu’udar órgaun administrasaun eleitorál.

Notísia Relevante: Alterasaun ba lei eleitorál tolu armoniza prátika implementasaun

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here