Arte Moris, Comoro, Dili. Imajen/Dok.Arte Moris

DILI, 28 juñu 2021 (TATOLI)-Diretór Arte Moris, Iliwatu Danapere, husu Governu fó fatin ne’ebé dignu ba sira atu sira kontinua sira-nia obra no papél ne’ebé iha ona.

Notísia Relevante : SEAK sei konvense Arte Moris muda ba Bebora

Diretor Arte Moris, Iliwatu Danabere. Imajen Tatoli/Jogerjo Guterres

“Iha semana kotuk ami ba tiha ona Diresaun Nasionál Terras Propriedade (DNTP) ami rekolla informasaun kona-bá ami-nia fatin ne’ebé daudaun ne’e Governu indika hela armazén Bebora nian mai ami, maibé ami esplika ba sira katak fatin ne’e la favoravel no la sufisiente atu akomoda ami no fó beran ba ami atu kontinua ami-nia atividade,” Iliwatu hateten ba jornalista-sira iha Arte Moris, Comoro, Dili, segunda ne’e.

Fatin ne’ebé daudaun Governu oferese atu sai fatin Arte Moris, nia dehan, sira sei tenta hela marka audiénsia ho Primeiru-Ministru atu fó opsaun ki’ik ruma ne’ebé bele disponivel atu kontinua sira-nia atividade.

Nia dehan, Arte Moris atu sai hosi fatin refere to’o agora sira seidauk hetan notifikasaun ka karta formál ruma hosi kualkér entidade. Maibé, semana ida no rua ba kotuk, haree veteranu-sira ba kontinua hamoos fatin ona, nune’e Arte Moris espera Governu bele fasilita fó fatin ne’ebé sufisiente ba sira.

Notísia Relevante : CCLN mantein utiliza edifísiu Arte Moris Comoro

Daudaun fatin ne’ebé Arte Moris aponta ka hakarak no sufisiente ba sira fatin eis word vision no ida seluk mak daudaun ne’e veteranu sira uza hela iha Hotél Timor nia kotuk Colmera.

“Ami garante katak Arte Moris sei la mate, atu Governu ajuda ka laaAjuda ami-nia kriatividade ne’e sei kontinua nafatin, maibé ami husu Governu ajuda ami nune’e bele fó oportunidade ba joven sira ne’ebé aprende sei bele hetan oportunidade atu aprende,” nia hateten.

Arte Moris ne’ebé hola nia papél importante iha prosesu dezenvolvimentu liuhosi programa edukasaun non formal, ne’ebé forma foin sa’e sira kona-bá arte , múzika pintura, mulitimédia ka teatru.

“Tempu ona Estadu tenke investe ezisténsia Arte Moris nu’udár instituisaun ne’ebé fornese edukasaun non formal, tanba konstituisaun RDTL, artigu 43 alínea, ida, hateten katak ema hotu-hotu hetan Liberdade ba asosiasaun ho hanoin ida ne’ebé la hala’o violénsia no halo tuir lei haruka, entaun Arte Moris dezenvolve foin sa’e sira-nia futuru, Arte Moris nia atividade sira orienta ita-nia foin sa’e sira harii kapasidade ka forma foin sa’e sira atu kria servisu ba sira-nia an hodi hamenus dependénsia ba Governu,” diretór Ezekutivu FONGTIL, Daniel Santos do Carmo hateten liuhosi konferénsia imprensa.

Ho situasaun ne’ebé daudaun ne’e Arte Moris enfrenta FONGTIL hanoin katak Sekretáriu Estadu  Arte no Kultura iha planu estratéjia ne’ebé sustentavel, internu dezenvolvimentu arte iha Timor-Leste.

SEAK konsidera Arte Moris nu’udár parseiru primária ba dezenvolve arte, FONGTIL hanoin katak, oinsá mak SEAK bele parseira ho Arte Moris internu dezenvolve arte iha Timor-Leste.

FONGTIL mós kestiona daudaun ne’e Arte Moris atu sai maibé seidauk simu notifikasaun formal ruma hosi terras propriedade tuir lei, atu Arte Moris husik fatin refere.

FONGTIL rekomenda ba Ministériu Justisa liuliu Sekretáriu Estadu Terras Propriedade no SEAK atu re-aloka fatin foun ne’ebé espasu fatin natoon, dignu iha sentru nune’e Arte Moris atu halo nia papél nu’udar sosiedade sivíl ne’ebé haforsa papél Governu ba dezenvolvimentu arte iha Timor-Leste.

FONGTIL rekomenda atu Ministériu Edukasaun no Ministériu Ensinu Superiór, Siénsia no Kultura, konsidera Arte Moris nu’udár parseiru primária iha kontestu edukasaun non formal foka ba dezenvolvimentu.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here