Prezidente KKLN, Vidal de Jesus 'Riak Leman’. Imajen Tatoli/António Gonçalves

DILI, 14 setembru 2020 (TATOLI)-Konsellu Kombatente Libertasaun Nasionál (CCLN, sigla portugés) mantein ho desizaun Governu nian hodi okupa edifísiu Arte Moris, Comoro.

Prezidente CCLN, Vidal de Jesus ‘Riak Leman’, ko’alia asuntu ne’e hodi hatan ba preokupasaun grupu veteranu lideradu hosi veteranu Terra Bulak katak sira hakarak Governu entrega edifísiu Phoenix, ne’ebé lokaliza iha Caicoli, munisípiu Dili hodi harii sede CCLN.

“Konsellu Veteranu deside ona iha Arte Moris nia fatin tanba Prezidente Repúblika no Primeiru-Ministru entrega ona fatin ne’e ba konsellu. Ha’u laiha koñesementu kona-ba veteranu Terra Bulak ba hasoru Primeiru-Ministru, antes atu ba hasoru telfone duni ha’u dehan sira atu ba hasoru, ne’ebé ha’u dehan sira ba hasoru ne’e problema imi-nia no konsellu laiha buat ida,” relata Prezidente CCLN, ba Agência Tatoli, via telefónika, segunda ne’e.

Tuir Riak Leman, CCLN ne’e hambrik atu rezolve  problema veteranu la’ós atu preokupa ho fatin sira.

“Konsellu hambrik ne’e atu haree problema veteranu sira, ne’ebé ba lakon tempu ho fatin sira ne’e halo saida. Kona-ba fatin ne’ebé deside iha Arte Moris ne’e legalmente Prezidente Repúblika no Primeiru-Ministru entrega ona, ne’ebé ami hein de’it ona osan atu hadi’a,” nia akresenta.

Enkuandu grupu veteranu lidera hosi Terra Bulak hasoru malu ho Primeiru-Ministru, Taur Matan Ruak, hodi husu ba Governu entrega edifísiu Phoenix harii sede CCLN.

“Ami mai husu ba Primeiru-Minsitru atu autoriza deside edifísiu Caicoli hodi harii sede veteranu, ami hakarak edifísiu Caicoli ne’e tanba fatin ne’e iha istória ne’ebé maka antes ne’e edifísiu ne’e kontra inimigu, tanba ne’e hanesan fatin istóriku,” dehan Terra Bulak.

Entretantu, edifísiu Caicoli (eis edifísiu DPR tingkat 1) antes ne’e Governu entrega ona atu harii edifísiu Tribunál Rekursu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here