Komisaun A ne’ebé trata asuntu Justisa no Konstituisionál hahú debate lei eleitorál tolu (3) iha munisípiu Aileu. Imajen Tatoli/Evaristo Soares Martins.

AILEU, 23 juñu 2021 (TATOLI)—Komisaun A ne’ebé trata asuntu Justisa no Konstituisionál hahú debate lei eleitorál tolu (3) iha munisípiu Aileu iha faze espesialidade maibé iha loron dahuluk hahú ho proposta-alterasaun ba lei órgaun administrasaun eleitorál.

Notísia Relevante: PN altera ona lei eleitorál tolu iha jeneralidade

Prezidente Komisaun A, Deputadu Joaquim dos Santos “Boraluli” . Imajen Tatoli/Evaristo Soares Martins.

“Ohin, ita hahú debate pakote lei eleitorál tolu ne’e iha Aileu no ita hahú uluk ho proposta-alterasaun ba lei órgaun administrasaun eleitorál,” Prezidente Komisaun A, Deputadu Joaquim dos Santos “Boraluli” ko’alia hodi loke sesaun sirkulasaun iha Hotel Mukit, Aissirimou, Aileu, kuarta ne’e.

Proposta-alterasaun ba lei órgaun administrasaun eleitorál komposta hosi alterasaun hamutuk artigu hamutuk lima (5) mak hanesan artigu 1 (objetu) ne’ebé konsta iha alterasaun dahuluk ba lei númeru 5/2006, 28 dezembru

Nune’e mós artigu 2 (alterasaun lei númeru 5/2006, 28 dezembru) kona-ba objetu alterasaun), artigu 3 (normativu revogatória) ne’ebé propoin revoga artigu 14 hosi lei refere, artigu 4 ne’ebé determina republikasaun iha lei refere, ho alterasaun introduzida hosi prezente lei nesesária kona-ba korresaun gramátika no lejístika no artigu artigu 5 kona-ba entrada ein-vigór.

Ministru Administrasaun Estatal (MAE), Miguel Pereira de Carvalho, hateten objetivu prinsipál hosi proposta-lei tolu ne’e mai Parlamentu Nasionál atu kumpre programa VIII Governu Konstitusionál nian iha área administrasaun eleitorál.

“Hodi halo revizaun no halo atualizasaun ba lejizlasaun eleitorál sira ho forma atu fortalese klarifika no pandemia COVID-19 ne’e halo ita tau hanoin ruma oinsá atu organiza eleisaun prezidensiál no mós eleisaun parlamentár tuir mai,” nia esplika.

Iha loron segunda liubá, proposta-alterasaun datoluk ba lei númeru 5/2006, 28 dezembru, kona-ba órgaun administrasaun eleitorál ne’e altera iha faze jeneralidade ho rezultadu votasaun a-favór 36, kontra 0 no abstensaun 15.

Pakote lei eleitorál tolu ne’e kompostu hosi alterasaun datoluk ba lei númeru 5/2006, 28 dezembru, kona-ba órgaun administrasaun eleitorál, alterasaun dahuluk ba lei númeru 6/2016, 25 maiu, kona-ba lei resensiamentu eleitorál no proposta-lei alterasaun daneen ba lei 7/2006, 28 dezembru, kona-ba lei eleitorál ba prezidente-repúblika.

Tuir observasaun Agência TATOLI, debate iha loron dahuluk ne’e hahú uluk ho proposta-alterasaun ba lei órgaun administrasaun eleitorál ne’ebé organiza hosi Komisaun A.

Membru komisaun A ne’ebé partisipa iha debate ne’e mak hanesan Deputadu Joaquim dos Santos, Francisco de Vasconselos, Adriano do Nascimento, Luis Roberto da Silva, Dário Madeira, Patrocínio Fernandes dos Reis, José Pacheco Soares no deputada Carmelita Caetano Moniz.

Hosi parte Governu partisipa hosi Ministru Administrasaun Estatal Miguel Pereira de Carvalho, Vise-Ministru Administrasaun Estatál, Lino de Jesus Torrezão, Prezidente Komisaun Nasionál Eleisaun (CNE-sigla portugés) Alcino de Araújo Barris no Diretór Jerál Sekretariadu Tékniku Administrasaun Estatál (STAE) Acilino Manuel Branco.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here