Governu liuhosi Institutu Nasionál Seguransa Sosiál (INSS) no BNCTL realiza pagamentu ba Indozu no Invalidés iha sede suku Becora, kuarta (23/06). Imajen Tatoli/Francisco Sony.

DILI, 23 juñu 2021 (TATOLI)—Prezidente Institutu Nasionál Seguransa Sosiál (INSS), Longinhos Armando Leite hateten, tersa ne’e Governu liuhosi INSS ho BNCTL halo ona pagamentu subsídiu ba idozu, invalidés no defisiénsia hamutuk 97.717.

Notísia Relevante: Governu sei halo pagamentu ba idozu-inválidez iha 23 juñu

“Ohin ne’e ita halo pagamentu ba ita-nia ferik-katuas inklui Rejiaun Administrativa Espesiál Óe-Cusse Ambeno (RAEOA). Ohin pagamentu ba faze dahuluk nian mak hamutuk 97.717 ho nia orsamentu millaun $16 inklui idozu no invalidés,” Prezidente INSS hateten ba jornalista sira iha suku Becora, postu Administrativu Cristo Rei, munisípiu Dili, kuarta ne’e.

Pagamentu ba benefisiáriu idozu no invalidés ne’e, nia dehan, ema ho defisiénsia sira kuaze 8000-resin no restante ne’e mesak ferik-katuas (terseira idade) mak simu subsídiu refere.

Entretantu Xefe Suku Becora, António da Silva Soares, kontente ho Governu liuhosi Institutu Nasionál Seguransa Sosiál (INSS) no Banku Nasionál Komérsiu Timor-Leste (BNCTL), tanba sira-nia programa selu idozu no invalidés ne’e direta ba suku nune’e fasilita di’ak liután populasaun.

“Ohin, loron dahuluk Governu halo pagamentu ba idozu no invalidés iha ami-nia suku Becora. Ho ne’e, ha’u sente kontente tanba ha’u-nia populasaun la kolen tanba Governu mai direta hodi selu no pagamentu to’o loron tolu,” nia dehan.

Líder komunitáriu ne’e hatutan, benefisiáriu sira hanesan idozu no invalidés ne’ebé daudaun ne’e atu simu pagamentu iha suku Becora hamutuk 8000-resin.

Benefisiáriu subsídiu ba idozu, Veronica dos Santos Andrade, hateten programa Governu nian ba períodu dahuluk ba tinan ne’e kapaas tebes tanba sira simu direta de’it iha sira-nia suku laran.

“Pagamentu ba idozu no invalidés iha Suku Becora ne’e kapaas tebes tanba bele fasilita ami hodi la la’o ba-mai no la lakon osan ba transporte. Agora, simu iha suku ne’e ami sente kontente. Uluk ne’e, ami terus liu tanba ita tenke ba sena malu ho ema mane sira no dala ruma ita bele monu,” nia dehan.

Notísia Relevante: INSS submete dadus idozu 94.000 ba BNCTL atu prodús ATM

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here