Ferik no katuas sira neebe tama ona terseira idade forma hela iha BNCTL hodi simu sira nia subsidiu, Tersa (29/12/2020) Imajen Tatoli/Antonio Goncalves

DILI, 26 maiu 2021 (TATOLI)—Governu liuhosi Instituutu Nasionál Seguransa Sosiál (INSS) submete ona dadus idozu (terseira idade) hamutuk ema na’in-94.000 ba Banku Nasionál Komérsiu Timor-Leste (BNCTL, sigla portugés) atu prodús kartaun Automated Teller Machine (ATM).

Notísia Relevante: Evita forma naruk, BNCTL promete atribui kartaun ATM ba idozu

Prezidente Konsellu Administrasaun Institutu Nasionál Seguransa Sosiál (INSS), Longinhos Armando Leite, hateten ida-ne’e hafoin hala’o primeira alterasaun ba akordu kooperasaun apoiu terseira idade no ema ho defisiénsia entre BNCTL no INSS ne’ebé asina iha segunda (24/05/2021) ne’e.

“Dadus ne’ebé ami haruka ba BNCTL ne’e hamutuk ema na’in-94.000 ne’e atu prodús ATM ba ferik-katuas (idozu) sira, nune’e sira mós tenke prepara ATM to’o númeru ne’ebé ita haruka ba ne’e. Maibé, ita-nia hakarak iha maiu nia-laran halo pagamentu ne’e, ferik-katuas sira-ne’e atu uza ona ATM ne’e. Maibé, ida-ne’e parte institutu nian, hosi Governu hakarak aplika ona iha maiu ne’e, nune’e bele ajuda ita-nia ferik-katuas sira hodi foti osan,” Longinhos Armando Leite hateten ba Agência TATOLI, iha nia knaar fatin, Caicoli, Dili, kuarta ne’e.

Tuir akordu ne’e BNCTL mak atu implementa, entaun presiza hatene BNCTL nia tempu no preparasaun liu-liu iha situasaun pandemia COVID-19 nia laran ne’e. Tanba, bainhira ema ba munisípiu tenke tuir teste swab entaun presiza tempu foin mak bele implementa.

“Akordu ne’e ami hala’o nanis tiha ona durante ne’e. Ita-nia banku mak fasilita ita hodi pagamentu ba ita-nia ferik-katuas sira. Uluk ami halo akordu maibé agora estende tan iha buat balun ne’ebé iha akordu laran ne’e ami muda tiha. Ezemplu, hanesan sira prontu fasilita ATM ba ita-nia ferik-katuas sira, tanba ho serka sanitária ho estadu emerjénsia ho tan moras COVID-19 ne’ebé espalla hela iha mundu inklui mós Timor-Leste. Tanba ne’e mak BNCTL atu kria ATM ida no atribui ba idozu sira,” nia dehan.

Maibé, nia hateten, ATM ne’e nia-durasaun ba tinan ida de’it no labele liu ida, tanba hafoin bainhira halo ona pagamentu haree katak ema ne’e sei nafatin moris ka lae, se moris entaun bele levanta halo ativu fali.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here