Ferik no katuas-sira forma hela iha BNCTL oin hodi simu subsídiu, tersa (29/12/20). Imajen Tatoli/António Gonçalves.

DILI, 18 juñu 2021 (TATOLI)—Institutu Nasionál Seguransa Sosiál (INSS), sei halo pagamentu ba idozu no inválidez iha 23 juñu, no mantein kumpre regra Organizasaun Mundiál Saúde (OMS) ho Ministériu Saúde (MS).

Orsamentu ne’ebé INSS prevee no sei selu liu hosi Banku Nasionál Komérsiu Timor-Leste (BNCTL sígla portugés), ba periúdu dahuluk iha tinan ne’e, ho montante $17.034.180.

Notísia relevante:INSS submete dadus idozu 94.000 ba BNCTL atu prodús ATM

INSS kooderna ona ho Sentru Integradu Jestaun Krize (SIJK), liuliu presija hetan autorizasaun tanba oras-ne’e daudaun munisípiu balun sei implemeta hela serka sanitária.

“Ita presiza atu hetan dadus hosi SIJK, nune’e ita bele la’o tuir tanba aldeia barak sei iha hela serka sanitária no proposta hato’o ona,” Prezidente administrasaun INSS, Longuinhos Armando Leite, hateten iha salaun MSSI, Caicoli, sesta ne’e.

INSS mós sei serbisu hamutuk ho Ministériu Administrasaun Estatál (MAE) atu orienta autoridade komunitária-sira hodi fó apoiu durante prosesu pagamentu, liuliu haree kona-bá distansiamentu sosiál.

Tuir planu, loron ida sei halo pagamentu ba ema na’in 200 iha suku ida, tanba evita transmisaun surtu COVID-19 ba inan-aman sira ho idade avansadu.

Totál benefisiáriu hosi munisípiu 12 no Rejiaun Administrativa Espesiál Oecusse Ambeno (RAEOA), ne’ebé atu simu subsídiu iha 23 juñu 2021 hamutuk 94.717, hosi númeru ne’e, invalidéz hamutuk 8.000-resin no restu idozu-sira.

Entretantu, pagamentu ba idozu no invalidéz ba periúdu dahuluk tinan ne’e, númeru aumenta kompara ho periúdu daruak iha 2020, ne’ebé ho totál 84.000.

Jornalista: Osória Marques/Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here