Ministru Administrasaun Estatal, Miguel Pereira de Carvalho (tuur klaran loloos). Imajen Tatoli/Evaristo Soares Martins.

AILEU, 23 juñu 2021 (TATOLI)—Ministru Administrasaun Estatal (MAE), Miguel Pereira de Carvalho, fundamenta razaun promove koodernasaun entre Komisaun Nasionál Eleisaun (CNE-sigla portugés) no Sekretariadu Tékniku Administrasaun Eleitorál (STAE) iha eleisaun prezidensiál no parlamentár.

Notísia Relevante: Pakote lei eleitorál tolu sei la implika CNE nia servisu

Governante ne’e esplika, lei órgaun administrasaun eleitorál atuál (lei vijente) ne’e loloos kompeténsia CNE nian mak aprova regulamentu sira ba aktu eleitorál, maibé iha eleisaun 2017 no 2018 regulamentu ba aktu eleitorál ne’e halo fali ho dekretu Governu.

“Saida mak temi iha lei atuál dehan katak CNE mak tenke aprova regulamentasaun sira, maibé CNE la halo. Regulamentasaun sira durante ne’e Governu mak halo, entaun ami hanoin katak atubele fó legalidade ba aktu administrativu,” Ministru Administrasaun Estatál fundamenta proposta-alterasaun datoluk ba lei númeru 5/2006, 28 dezembru, kona-ba órgaun administrasaun eleitorál iha espesialidade loron dahuluk ne’ebé realiza iha Hotel Mukit, Aissirimou, Aileu, kuarta ne’e.

Nia hatutan, regulamentasaun Governu ne’ebé sei fó-sai ba aktu eleitorál sira tuir mai presiza legaliza tán.

“Ne’e mak ami propoin iha proposta ida-ne’e invez CNE mak aprova regulamentu aktu eleitorál sira-e’e, di’akliu Governu maka aprova. Tanba razaun ida-ne’e mak ami hanoin katak labele husik de’it hanesan ne’e,” nia dehan.

Entretantu deputadu Bankada Partidu Demokrátiku, Deputadu Adriano do Nascimento, apoia proposta Governu nian tanba CNE ho STAE presiza iha koordenasaun iha kualkér eleisaun.

Maibé Deputadu Bankada CNRT, Patrocínio dos Reis Fernandes, la konkorda ho proposta ne’e tanba CNE nia kompeténsia halo supervizaun ba aktu eleitorál maibé STAE ne’e kompeténsia mak tékniku administrasaun eleitorál.

Notísia Relevante: CNE propoin ba PN haketak kompeténsia ho STAE

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here