Prezidente CNE, Alcino de Araújo Barris . Imajen TATOLI/Egas Cristovão.

DILI, 22 juñu 2021 (TATOLI)—Prezidente Komisaun Nasionál Eleisaun (CNE-sigla portugés), Alcino de Araújo Barris, hateten pakote lei eleitorál tolu ne’e sei la fó impliksaun ba CNE nia servisu.

Motísia Relevante: CNE hato’o paresér ba PN kona-ba pakote lei eleitorál tolu

“Pakote lei tolu ne’e sei la implika servisu CNE nian, tanba durante ne’e CNE hola parte ativa no hetan konsiderasaun hosi Parlamentu Nasionál liu-liu komisaun A. Bainhira diskusaun artigu pur artigu mak ha’u hanoin sei la implika tanba kualker altera ka mantein tenke fundamenta, tanba ne’e mak CNE hola parte no partisipa iha laran”, Alcino Barrís hateten ba Ajénsia TATOLI, iha nia knaar fatin, Colmera, Dili, tersa ne’e.

CNE halo estudu viabilidade ida ba lei ein-vigór katak lei balun ne’ebé presiza ajusta tuir dinámika ba nesesidade, entaun inisiativa ne’e hosi CNE mak revee artigu balun no halo revizaun ba lei ne’ebé mak CNE propoin karik altera iha loron ikus mai.

Antes ne’e CNE mós halo treinamentu ida hodi involve entidade instituisaun Governu hanesan Ministériu Administrasaun Estatál (MAE) no Ministériu Justisa, konvoka enkontru ho partidu politíku no Organizasaun Naun Governamentál sira inklui parte akadémika, atu fó hatene lakuna sira hodi identifika lei sira-ne’ebé CNE halo.

“Lakuna teknikamente iha lubuk ida maibé ne’e prátika la’ós tendénsia no gostu. Maibé, prátika demostra buat balun ne’ebé presiza ita revee. Entaun, ita kanaliza ba Governu liuhosi MAE no MAE tenta halo abordajen ida no halo elaborasaun foun fali, no MAE mak lori fali proposta lei ne’e ba iha Konsellu Ministru. Bainhira aprova depois lori ba Komisaun A,” nia dehan.

Bainhira CNE haree no repara iha buat balun ne’ebé la pretende iha laran entaun tenke haree fila-fali no sira balun la tau entaun haruka para altera, nune’e CNE halo paresér ba Komisaun A bele konsidera.

“Tanba ne’e, aban sei ba diskute iha Aileu ba artigu lei ida pur ida. Nune’e prevalese ba tempu naruk ba órgaun administrasun eleitorál sira tantu lei eleisaun prezidensiál, lei resensiamentu eleitorál no lei partidu politíku inklui lei eleisaun parlamentár,” nia dehan.

Tanba ne’e, CNE hato’o preokupasaun no tenta beibeik atu kontinua halo re-ajustamentu loloos tanba iha prátika ne’e CNE ho STAE mak hala’o. STAE teknikamente prepara materiál hotu maibé CNE haree forsa lei ne’e tanba buat ne’e hala’o ne’e orientasaun normativamente lei nian nune’e CNE tenke haree.

Motísia Relevante: Aumenta sentru votasaun fasilita taxa partisipasaun eleitór sira

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here