Prezidente CNE, Alcino de Araújo Barris. Imajen TATOLI/Egas Cristovão.

DILI, 08 juñu 2021 (TATOLI)—Komisaun Nasionál Eleisaun (CNE-sigla portugés) propoin ba Parlamentu Nasionál (PN) atu haketak kompeténsia ho Sekretariadu Tékniku Administrasaun Eleitorál (STAE) tanba CNE nia kompeténsia halo supervizaun ba aktu eleitorál sira.

Notísia Relevante: Governu propoin aplika sentru votasaun paralelu iha eleisaun prezidensiál

Prezidente CNE, Alcino de Araújo Baris, solisita ba Parlamentu Nasionál husu hasai tiha palavra la-vinkulativu liuhosi alterasaun datoluk ba lei númeru 5/2006 kona-ba órgaun administrasaun eleitorál.

Razaun CNE husu elimina tanba CNE nu’udar órgaun independente ne’ebé iha kompeténsia hodi halo supervizaun tuir konstituisaun artigu 65.6, iha esperiénsia no referénsia adekuada hodi fó paresér liga ho aktu eleitór, maibé karik paresér ne’ebé CNE fo la-vinkulativu CNE prefere kompeténsia ne’e elimina tiha.

“CNE nia pareser husu hasai koordenasaun ho STAE no mantein redasaun anteriór tanba CNE nu’udar órgaun independente hosi kualkér órgaun poder polítiku, sentrál ka lokál, goza autonómia finanseira, administrativa no organizativa. CNE nia kompeténsia la hanesan ho STAE nian,” Prezidente CNE fundamenta iha paresér ba Komisaun A iha Parlamentu Nasionál, tersa ne’e.

Tanba CNE nia vizaun mais polítika ho finalidade motiva hodi eleva taxa partisipasaun eleitór iha aktu eleitorál sira, enkuantu STAE nia kompeténsia mak órgaun tékniku ne’ebé tutela ba Ministériu Administrasaun Estatál hodi organiza edukasaun votante iha períodu eleisaun.

Tuir nia, bainhira CNE realiza edukasaun sívika la nesesária obrigatóriu tenke koordena ho STAE.

Nune’e mós edukasaun votante hala’o hosi STAE, refere liu ba eleitór sira oinsá atu vota ho loloos tanba bele kauza (votu nulu, votu branku, votu kanseladu no votu abandonadu), no informasaun seluk referente ba baze dadus eleitorál.

Maske nune’e, Ministru Administrasaun Estatál, Miguel Pereira de Carvalho, hateten proposta-alterasaun kona-ba órgaun administrasaun eleitorál ne’e Governu hakarak halo koordenasaun entre CNE ho STAE.

Tanba ne’e mak Governu propoin halo  alterasaun ba lei eleitorál tolu ne’e kompostu hosi alterasaun datoluk ba lei númeru 5/2006, 28 dezembru kona-ba órgaun administrasaun eleitorál, alterasaun dahuluk ba lei númeru 6/2016, 25 maiu kona-ba Lei resensiamentu eleitorál no proposta-lei alterasaun daneen ba lei 7/2006, 28 dezembru, kona-ba lei eleitorál ba Prezidente Repúblika.

“Razaun halo alterasaun ba lei tolu ne’e oioin de’it, atu iha koordenasaun entre órgaun administrasaun eleitorál sira hanesan STAE ho CNE,” nia dehan. 

Notísia Relevante: CNE hato’o paresér ba PN kona-ba pakote lei eleitorál tolu

Jornalista: Evaristo Soares Martins

Editór: Cancio Ximenes