Prezidente Autoridade RAEOA, Arsénio Paixão Bano, lansa vasina AstraZeneca doze daruak iha sub-rejiaun Pasabe. Imajen Tatoli/Abilio Elo Nini.

OÉ-CUSSE, 22 junu 2021 (TATOLI)—Prezidente Autoridade (PA) Rejiaun Administrativa Espesiál Oé-Cusse Ambeno (RAEOA), tersa ne’e ofisiálmente lansa vasina AstraZeneca doze daruak iha sub-rejiaun Pasabe ne’ebé fó prioridade ba front line hamutuk 980 inklui idozu idade 60 ba leten hamutuk 150 ho AstraZeneca 98 vial (frasku).

Notísia Relevante: RAEOA simu ona vasina AstraZeneca dozes 8000 hosi Governu sentrál

Arsénio Paixão Bano enkoraja abitante sira atu labele fiar lia bosok kona-ba vasina AstraZeneca tanba Governu ajuda nia povu atu livre hosi moras COVID-19. Atu kombate COVID-19 ne’e, komunidade tenke simu vasina, nune’e bele proteje-aan hosi moras ne’e hanesan proteje nasaun Timor-Leste.

“Husu inan-aman no ferik-katuas sira tenke simu vasina AstraZeneca ne’e, atu aumenta ita-nia imunidade atu hasoru moras oioin. Labele rona ema mai bosok ita, fiar de’it ba ita-nia profisionál saúde sira. Guvernu ajuda ita atu moris no livre hosi moras ne’e. Tanba ne’e atu kombate COVID-19 tenke simu vasina, nune’e ita bele proteje-aan no bele hala’o ita-nia atividade rekuperasaun ekonomia. Proteje-aan hosi moras, hanesan mós proteje Oé-Cusse no ita-nia nasaun (TL),” Arsénio Paixão Bano hato’o lia hirak ne’e, iha seremónia lansamentu vasina AstraZeneca doze daruak iha sub-rejiaun Pasabe ne’ebé realiza iha suku Abani, aldeia Pasabe.

Tanba ne’e, nia enkoraja profesór no autoridade lokál sira atu fó aviza ba komunidade iha bairru no aldeia hodi hakat ba fatin Komisaun Prevensaun no Mitigasaun Prepara ona atu simu vasina, nu’udár simbólu ida hanesan pasaporte viajen iha rai laran no livre hosi kuarentena obrigatóriu

Komunidade Pasabe tuir serimónia lansamentu vasina AstraZeneca doze daruak hia Pasabe. Imajen Tatoli/Abilio Elo Nini.

“Xefe aldeia no xefe suku sira fó hatene no esplika ba ita-nia komunidade sira atu simu vasina ne’e. Husu mós ba mestre sira tenke simu vasina tanba bainhira imi ba Dili, autoridade sei la autoriza kuandu imi sedauk simu vasina. Hirak ne’ebé mai hosi fatin seluk, ne’ebé seidauk simu vasina, tenke tama kuarentena no auto-kuarentena obrigatóriu durante loron 14 nia laran. Tanba ne’e, kartaun kinur ne’e hanesan pasaporte viajen ba-mai. Se laiha kartaun kinur, Guvernu sei la autoriza,” Arsénio Bano hateten.

Iha fatin hanesan, Jestór sub-rejiaun Pasabe, Anton Ulan, hato’o agradesimentu ba VIII Guvernu Konstitusionál liuhosi autoridade RAEOA tanba ho espíritu lahatene kolen bele hakbesik-aan ba komunidade Pasabe hodi enkoraja atu simu vasina AstraZeneca ho gratuitamente

“Agradese ba VIII Guvernu Konstitusionál ne’ebé deside ho firme atu lori povu tomak simu vasina, atu nune’e bele redús no hakotu transmisaun COVID-19 liu-iu iha RAEOA atu labele akontese transmisaun lokál,” nia dehan.

Hafoin lansamentu ne’e, atividade vasainasaun ne’e sei hala’o iha sentru vasinasaun iha sub-rejiaun Pasabe hamutuk fatin 10 ne’ebé komopstu hosi fatin neen (6) iha suku Abani no fatin (4) iha suku Malelat.

Iha biban ne’e, Sekretáriu Rejionál Asuntu Saúde, Manuel da Costa informa totál populasaun sira-ne’ebé identifikadu atu simu vasina AstraZeneca ne’e, iha sub-rejiaun Nitibe hamutuk 1.330, sub-rejiaun Pante Makasar hamutuk 2.990 no sub-rejiaun Oésilo hamutuk 1.260.

Totál populasaun iha sub-rejionál Pasabe tuir dadus sensu uma kain tinan 2015 haktuir sub-rejiaun Pasabe iha populasaun hamutuk uma kain 1.817 iha suku (2), hosi suku Malelat iha uma kain hamutuk 362 no suku Abani uma kain 1.455

Notísia Relevante: COVID-19: RAEOA rejista pozitivu tolu no ativu lima

Jornalista : Abilio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here