Ekipa saúde RAEOA dezinfekta pasajeiru ne’ebé viajen ho ró Sukses, iha portu Mahata (01/06/21). Imajen/média ZEESM TL.

OE-CUSSE, 06 juñu 2021 (TATOLI)—Komisaun ba Prevensaun no Mitigasaun COVID-19, Rejiaun Administrativa Espesiál Oe-cusse Ambeno (RAEOA), rejista kazu pozitivu tolu no totál ativu iha lima.

Prezidente autoridade RAEOA, Arsénio Paixão Bano, hanesan mós responsável másimu ba Komisaun ne’e, fó-sai katak, antes ne’e iha kazu pozitivu rua, no kazu pozitivu foun tolu ne’ebé komisaun foin deteta liu hosi teste swab ba pasajeiru-sira hosi Dili, ne’ebé submete hela ba auto-kuarentena iha otél Canare.

Notísia relevante:RAEOA prepara kuarentena simu Oé-Cusse-oan hosi Dili

“Husu povu atoni atu labele pániku, tanba kazu pozitivu tolu ne’e autoridade deteta, hafoin halo teste swab ba pasajeiru-sira ne’ebé mai hosi Dili, iha semana ida liu-bá,” Arsénio Paixão Bano, hateten ba jornalista Agência Tatoli, via telefónika, domingu ne’e.

Arsénio Bano husu ne’e tanba kazu tolu ne’e detedadu iha kuarentena obrigatóriu ka auto-kuarentena no seidauk iha transmisaun lokál nomós komunitária.

Ekipa saúde sei transporta sidadaun na’in-tolu ne’ebé detetadu pozitivu hosi otél ne’ebé sira hela, ba fali sentru izolamanetu klínika Coração Oe-cusse, hodi hetan tratamentu tuir protokolu izolamentu-nian iha RAEOA hamutuk ho pasiente rua seluk.

Parte autoridade husu ba atoni-oan ne’ebé viajen hosi Dili ka mai-hosi rai-liur atu kumpri nafatin protokolu prevensaun COVID-19, ne’ebé aplika iha Timor-Leste no kumpri medida prevensaun RAEOA.

Oras-ne’e daudaun, sidadaun ne’ebé kumpri hela kuarentena obrigatóriu iha RAEOA hamutuk na’in 124. Hosi númeru ne’e na’in 101 mak okupa otél Oe-upu, Sakato no dormitóriu Alfándega Mahata, no auto-kuarentena hamutuk na’in 23 iha otél Lifau ho rezidénsia Madre Dominicana. 

Dadus hosi autoridade RAEOA, rejista ema na’in 1.022 mak kumpri ona loron 14 iha kuarentena no auto-kuarentena. 

Regulamentu prevensaun COVID-19 iha RAEOA

Autoridade RAEOA estabelese ninia regulamentu-rasik atu halo prevensaun ba surtu COVID-19, hamutuk pontu 18:

  1. Husu pasajeiru hotu-hotu atu kumpri kuarentena no auto-kuarentena durante loron 14, maski mai ho misaun serbisu importante.
  2. Husu ba pasajeiru ne’ebé tama iha kuarentena no auto-kuarentena tenke uza máskra.
  3. Pasajeiru hotu-hotu tenke hakmatek iha fatin ka kuartu laran.
  4. Bainhira iha kuarentena no auto-kuarentena labele tur hamutuk, ida-idak iha kuartu laran
  5. Pasajeiru rua ka liu, bainhira rezultadu Swa teste pozitivu COVID-19 iha kuarentena no auto-kuarentena, pasajeiru hot-hotu sei re-kuarentena ou re-auto-kuarentena durante loron lima hodi hasai fila-fila Swab teste.
  6. Pasajeiru ne’ebé mak pozitivu COVID-19, sei evakua kedan ba sala izolamentu iha oras 12 nia laran.
  7. Bazeia ba mata-dalan Organizasaun Saúde Mundiál (OMS), no Ministériu Saúde (MS), bainhira to’o loron 10 iha kuarentena no auto-kuarentena hotu-hotu sei hasai Swab teste obrigatóriu.
  8. Bainhira pasajeiru ne’ebé kumpri loron 14, atu fila ba uma tenki halo dezinfekta sasan.
  9. Laiha fleksibilidade ba pesoál ne’ebé mai ho misaun serbisu eseptu iha lia mate.
  10. Pasajeiru ne’ebé tama mai-liu hosi dalan legál ka ilegál no hosi Dili mai ho ró marítima no aviaun, atu hetan evakuasaun ba kuarentena uza karreta privadu lori rasik no uza karreta COVID-19 tur iha kotuk.
  11. La autóriza família ka kualkér ema atu mai vizíta iha kuarentena laran.
  12. Pasajeiru hotu-hotu iha kuarentena lá autóriza atu joga karta, dansa, no loke múzika.
  13. La autóriza família lori sasán hanesan, rice-cooker, buli-chook, bikan, kanuru, kopu tama ba kuarentena.
  14. Autoriza família-sira atu lori sasán sanitasaun hanesan, sabaun, sampo, pastadente, eskova néhan, rinso, maibé sei fó tuir pesoál saúde-sira ne’ebé hein iha kuarentena no auto-kuarentena.
  15. Pesoál saúde sei fahe hahán iha ida-idak nia odamatan oin, la persiza hadau-malu.
  16. Labele so’e foer arbiru iha área kuarentena no auto-kuarentena laran, tenki so’e foer iha lixu fatin.
  17. Pasajeiru labele fó kualkér sasán ba família iha liur.
  18. Bainhira tama kuarentena, pesoál saúde no PNTL sei hela hamutuk ho pasajeiru iha kuarentena durante loron 14 nia laran.

Totál fatin kuarentena iha RAEOA hamutuk tolu mak hanesan, kuarentena fronteira Sakato, Dormitóriu Diresaun Alfándega Máhata, otél Oé-upun no auto-kuarentena iha rua mak hanesan otél Lifau no otél Kenari.

Notísia relevante:COVID-19: pozitivu 81, rekoperadu 152 no ativu 2.402

Jornalista: Abilio Elo Nini

Editór: Cipriano Colo

HAKEREK NO HATÁN

Please enter your comment!
Please enter your name here