iklan

COVID-19, MUNISÍPIU, OÉ-CUSSE (RAEOA)

RAEOA simu ona vasina AstraZeneca dozes 8000 hosi Governu sentrál

RAEOA simu ona vasina AstraZeneca dozes 8000 hosi Governu sentrál

Prezidente Autoridade RAEOA, Arsénio Paixão Bano, akompaña hosi Sekretáriu Saúde Manuel da Costa simu vasina AstraZeneca hosi Governuu sentrál. Imajen/Mídia ZEESM.

OÉ-CUSSE, 11 Juñu 2021 (TATOLI)—Prezidente Autoridade Rejiaun Administrátiva Espesiál Oé-Cusse Ambeno (RAEOA) no Komisaun Prevensaun no Mitigasaun COVID-19, Arsénio Paixão Bano informa, sesta ne’e autoridade RAEOA simu ona vasina AstraZeneca dozes 8000 ba doze daruak nian hosi Governu sentrál.

Notísia Relevante: COVID-19: RAEOA rejista pozitivu tolu no ativu lima

“Ohin, ita simu ona vasina AstraZeneca hamutuk 8000 ho 600 vial (frasku) hosi Governu sentrál. Ida-ne’e bele fó vasina ba ema na’in-8000 iha Oé-Cusse. Agora na’in 8000 ne’e primeiru ba sira ne’ebé simu ona vasina AstraZeneca. Sira ne’ebé simu ona vasina doze dahuluk ne’e hamutuk 1400,” Arsénio Paixão Bano hateten ba Agência TATOLI, via telefónika, sesta ne’e

Bainhira fó vasina tiha ema na’in-1400 ne’e, restu hamutuk 6000-resin ne’e sei fó vasina ba frontline sira seluk, ba ferik-katuás no ba sira-ne’ebé hakarak aumenta imunidade liu-liu ba jornalista no emprezáriu sira-ne’ebé sempre halo servisu ba públiku.

“Ita hein iha fulan setembru sei mai-tan, mínimu iha bele atinje ema na’in rihun 30 ba leten, bele hetan hotu vasina AstraZeneca iha Oé-Cusse. Se liután hosi ne’e, di’ak liután,” nia hateten.

Vasina AstraZeneca doze daruak ne’e, nia dehan, tuir planu sei lansa iha semana oin tanba sasán sira mai kompletu no ho ekipamentu sira seluk to’o ona iha Oé-Cusse.

“Ita-nia ekipa sira-mós iha esperiénsia ona ba vasina nian. Ohin mós reprezentante Organizasaun Mundiál Saúde (OMS) mai akompaña ita iha Oé-Cusse, entaun semana oin ita bele halo ona lansamentu,” nia dehan.

Vasina AstraZeneca doze dahuluk ne’e, Arsenio Bano, informa RAEOA atinje ona 20% tanba ema-ne’ebé simu vasina ne’e 1400 de’it. Agora, vasina ba doze daruak ne’e RAEOA sei bele atinje 60% hosi totál populasaun hamutuk rihun 85 (iha Oé-Cusse), tanba labarik sira idade 17 mai kraik sedauk bele simu vasina AstraZeneca.

Pasajeiru 91 submete teste swab obrigatóriu

Pasajeiru Atoni-oan ne’ebe hela iha kuarentena submete ba teste swab obrigatóriu. Imajen Tatoli/Abílio Elo Nini.

Entretantu Responsavel Pilár III, dtr. Titu Baptista Anunu, hateten sesta ne’e ekipa saúde halo teste swab ba pasajeiru Atoni-oan na’in-91 ne’ebé kompostu hosi pasajeiru na’in-87 hodi halo viajen iha 01 juñu foin lalais ne’e, hosi Dili-Oé-Cusse no pasajeiru ho ró Success na’in-haat (4).

Titu Baptista Anunu informa, pasajeiru na’in-91 sira-ne’e daudaun ne’e hela iha fatin kuarentena dormitóriu Mahata mesak mane hotu hamutuk na’in-44 no na’in-47 maioria mesak feto ne’e hela kuarentena Otél Oé-Upun

Iha parte seluk Prezidente Autoridade RAEOA, Arsénio Paixão Bano, hateten tuir regulamentu prevensaun COVID-19 ne’ebé aplika iha RAEOA, iha pontu hitu (7) ne’e sita katak bazea ba matadalan Organizasaun Munidál Saúde (OMS) no Ministériu Saúde (MS) ba pasajeiru sira, tenke kumpre teste swab obrigatóriu iha loron 10 molok kompleta kuarentena durante loron 14 nia laran

“Babain ita kuandu tama loron 10, ita halo teste swab. Depois ita haree rezultadu oinsá. Ida-ne’e obrigatóriu tanba teste swab ne’e tuir protokolu COVID nian tanba babain iha loron 10 ne’e masa inkubasi virus ne’e. Bainhira halo teste swab ne’e nia rezultadu negativu, entaun iha loron 14 ita liberta ona sira. Maibé kuandu rezultadu pozitivu, entaun sei halo re-kuarentena durante loron lima (5) to’o loron 10 mak foin liberta,” nia hateten.

Tanba ne’e, nia apela nafatin ba populasaun sira iha Oé-Cusse no Atoni-oan sira iha Díli atu mantein dixiplina hodi uza nafatin máskara, fase liman no mantein distánsia sosiál, tanba RAEOA oras ne’e daudauk rejista kazu positivu COVID-19 na’in-lima (5) ne’ebé hela sala izolamentu Klínika Kurasaun Oé-Cusse

Tuir dadus, pasajeiru Atoni-oan ne’eb’e halo viajen hosi Dili-Oé-Cusse ho ró Succes hamutyuk na’in-87 ne’e, balun hela iha Otél dormitoriu Dirasaun Álfandega Mahata hamutuk mane na’in-44 no feto na’in-36 ho mane na’in-tolu (3) hamutuk na’in 39 iha Otél Oe-Upun, no na’in-ida (1) auto-kuarentena iha otél Lifau.

Jornalista: Abilio Elo Nini

Editór: Cancio Ximenes

 

iklan
iklan

Leave a Reply

iklan
error: Content is protected !!