Organizasaun sosiedade sivíl-sira halo konferénsia imprensa iha sede FONGTIL, Dili, tersa (22/06). Imajen Tatoli/Arminda Fonseca

DILI, 22 juñu 2021 (TATOLI)-Organizasaun sosiedade sivíl-sira ne’ebé hamahan-an iha Forum Organizasaun Naun Governamentál Timor-Leste (FONGTIL) husu ba  Primeiru-Ministru (PM), Taur Matan Ruak, atu loke investigasaun profunda ba ekipa Ministériu Negósiu Estranjeiru no Kooperasaun (MNEK) ne’ebé vota abstensaun ba rezolusaun iha Asembleia Jerál Organizasaun Nasoins Unidas (ONU ba situasaun Myanmar.

Notísia Relevante : PN sei bolu MNEK esklarese razaun fundamentál votu abstensaun ba Myanmar

“Ami husu Primeiru-Ministru halo investigasaun ba ekipa ida ne’ebé mak halo vota abstensaun ba rezolusaun iha Asembleia Jerál ONU hanesan pontu importante ida hodi rezolve problema Myanmar,” diretór Asosiasaun HAK, Sisto dos Santos, afirma liuhosi konferénsia imprensa konjunta rede sosiedade sivíl ne’ebé hala’o iha salaun FONGTIL, Dili, tersa ne’e.

Organizasaun sosiedade sivíl-sira reklama ba Governu atu halo esplikasaun ba públiku kona-bá desizaun fó votu abstensaun ne’e karik tuir instrumentu legál ruma ka tuir estratéjia polítika externa ruma Timor-Leste (TL) nian.

Sira  mós ezije ba  Governu formalmente tenke esplika pozisaun TL nian iha mundu nu’udar afirmasaun ida, atu nune’e, labele hamonu nasaun ida ne’ebé mak nu’udár ikónika  ba demokrasia, direitu umanu no ikónika  ida ne’ebé mak sei haklaken fini liberdade espresaun iha rejiaun Aziátiku.

Sisto dos Santos, konsidera Timor-Leste halo istória foun fali hodi depozita votu abstensaun ba situasaun violasaun direitu umanu iha Myanmar no  Timor-Leste la reflete ba situasaun violasaun direitu umanu iha pasadu.

“Votu abstensaun ne’e kontra tebes konvensaun internasionál barak ne’ebé TL asina ona liuliu artigu 8 númeru rua, hosi Konstituisaun Repúblika Demokrátika Timor-Leste (KRDTL), ne’ebé ko’alia kona-bá halo relasaun di’ak ho harosan ba povu hotu-hotu atu hakotu lia didi’ak kona-bá konflitu sira, hatún kilat jerál, simultaneal no kontroladu harii sistema seguransa koletivu no hakiak orden ekonómiku internasionál foun ida atu bele kaer metin dame no justisa iha povu hot-hotu nia relasaun ba malu,” Sisto dos Santos afirma.

Organizasaun sosiedade sivíl reklama katak  Primeiru-Ministru presiza halo investigasaun tanba, Timor-Leste hanesan nasaun ida ne’ebé obra prinsípiu direitu demokrátiku tanba ne’e sira kestiona no preokupa pozisaun ida-ne’e hatudu katak Timor-Leste la konsistente ba nia solidariedade iha mundu no prinsípiu hanesan nasaun ne’ebé defende direitu-umanu.

Bazeia ba komunikadu ne’ebé Ministériu Negósiu Estranjeiru no Kooperasaun (MNEC-sigla portugés) hodi klarifika pozisaun TL nian vota abstensaun ba rezolusaun situasaun Myanmar nian ne’e nia dehan, ida ne’e la reprezenta sosiedade iha Timor-Leste.

“Vota abstensaun ne’ebé Governu halo la reprezenta ami ba situasaun ida ne’e. Timor-Leste hanesan ikónika  no aliserse ba demokrasia dezde 2002 no Timor-Leste asina ona konvensaun internasionál ba liberdade no polítika espresaun, hosi ne’e loloos ita profunda hodi hametin, hatudu ba rai seluk, maibé ita rasik mak dezvalida ita-nia prinsípiu sira ne’e,” Sisto afirma tan.

Lori FONGTIL nia-naran ho sosiedade ida ne’ebé mak hadomi ba paz, liberdade no direitu umanu, husu deskulpa ba povu Myanmar ne’ebé mak durante tinan naruk nia-laran iha represaun rejime ditadura nia okos.

Ba oin mak Governu la buka solusaun ba situasaun refere mak FONGTIL sei halo asaun prátika mak hanesan sei hakerek karta sei sirkula hela ho tradusaun inglés haruka ba Forum Asia, atu hateten katak pozisaun sosiedade Timor-Leste liuliu FONGTIL la apoiu saida mak Governu foti ba asuntu espesífiku ida ne’e.

Notísia Relevante : MNEK klarifika vota abstensaun ba problema Myanmar

Jornalista : Arminda Fonseca

Editór       :  Francisco Simões

HAKEREK NO HATÁN

Please enter your comment!
Please enter your name here