Prezidente CNE, Alcino Barris. Imajen/TATOLI Egas Cristovao.

DILI, 08 juñu 2021 (TATOLI)—Komisaun Nasionál ba Eleisaun (CNE) lideradu Alcino de Araújo Baris, hato’o paresér ua’in ba Parlamentu Nasionál (PN) kona-ba alterasaun ba lei eleitorál importante tolu nune’e alterasaun ba lejizlasaun eleitorál ne’e tuir prinsípiu ne’ebé hatuur ona iha Konstituisaun RDTL.

Notísia Relevante: Antes resesu, PN fó prioridade ba pakote lei eleitorál

Proposta-alterasaun ba lei eleitorál tolu (3) ne’e kompostu hosi alterasaun datoluk ba lei númeru 5/2006, 28 dezembru kona-ba órgaun administrasaun eleitorál, alterasaun dahuluk ba lei númeru 6/2016, 25 maiu kona-ba Lei resensiamentu eleitorál no proposta-lei alterasaun daneen ba lei 7/2006, 28 dezembru, kona-ba lei eleitorál ba Prezidente Repúblika.

“CNE nia objetivu estratéjiku ida mak kria paresér jurídiku ne’ebé di’ak ba orgáun ezekutivu no lejizládor hodi halo alterasaun ba lejizlasaun eleitorál tuir prinsipiu sira-ne’ebé hatuur iha Konstituisaun RDTL, no re-ajusta tuir dinámiku nesesidade hodi garante melloramentu aplikasaun lejizlasaun eleitorál nune’e bele konsolida no haburas liután demokrásia iha rai-laran,” Alcino de Araújo Baris hateten iha Parlamentu Nasionál, tersa ne’e.

Nia haktuir, ba objetivu estratejiku refere, hafoin eleisaun jerál 2017 no eleisaun antesipada 2018, CNE identifika kedas lakuna balun liga ho lei eleitorál sira no enkamiña ona ba parlamentu nomeadamente komisaun A no Governu hodi konsidera iha alterasaun.

Nune’e CNE solisita ba Parlamentu Nasionál no Governu hasai tiha palavra la-vinkulativu liuhosi alterasaun datoluk ba lei númeru 5/2006 kona-ba órgaun administrasaun eleitorál.

Razaun, CNE nu’udar órgaun independente ne’ebé iha kompeténsia hodi halo supervizaun tuir konstituisaun artigu 65.6, no iha esperiénsia no referénsia adekuada hodi fó paresér liga ho aktu eleitór, maibé karik paresér ne’ebé CNE fo la-vinkulativu CNE prefere kompeténsia ne’e elimina tiha.

CNE nia pareser mós husu hasai koordenasaun ho STAE no mantein redasaun anteriór tanba CNE nu’udar órgaun independente hosi kualkér órgaun poder polítiku, sentrál ka lokál, goza autonómia finanseira, administrativa no organizativa.

CNE nia kompeténsia la hanesan ho STAE nian tanba CNE nia vizaun mais polítika ho finalidade motiva hodi eleva taxa partisipasaun eleitór iha aktu eleitorál sira, enkuantu STAE nia kompeténsia mak órgaun tékniku ne’ebé tutela ba Ministériu Administrasaun Estatál hodi organiza edukasaun votante iha períodu eleisaun, tanba ne’e CNE kuandu realiza edukasaun sívika hanesan ona baibain, la nesesariamente obrigatóriu tenke koordena ho STAE.

Nune’e mós edukasaun Votante hala’o hosi STAE, refere liu ba eleitór sira oinsá atu vota ho loloos, tanba bele kauza (votu nulu, votu branku, votu kanseladu no votu abandonadu) no informasaun seluk referente (referénsia) ba baze dadus eleitorál.

CNE nia pareser husu hasai preferensialmente diretór munisipál hosi CNE nian hodi mantein redasaun anteriór tanba entre delegadu/a no diretór/a nia tarefa ka kompeténsia la hanesan.

Diretór/a sira-nia kna’ar liga ba aktu administrativu, delegadu/a sira-nia servisu liga liu ba aktu eleitoral sira. Estrutura ne’e ezistente funsiona hela, no presizamente ho estrutura ne’r mak konsege garante koordenasaun ne’ebé di’ak ho kamada sosiedade sira no garante supervizaun ne’ebé efetivu tebes durante eleisaun 2017 no 2018.

Asuntu seluk ne’ebé CNE konsidera nesesária hodi halo alterasaun, tanba ne’e mak CNE husu ba Parlamentu Nasionál hodi altera lei órgaun administrasaun eleitorál artigu 6 relasiona ho estatutu (subsídiu Komisáriu CNE), Ekiparasaun, Prezidente CNE ho Provedor/a Diretus Humanos no Komisariu sira ekiparadu ho adjuntu/a provedor/a nune’e dignifika membru CNE tanba CNE hari’i bazeia ba Konstituisaun RDTL artigu 65.6.

CNE nia paresér husu hasai tiha aprova por Lei no troka ho aprova por rejimentu internu, se lae ema hateten oho susuk ho bazoka.

Sekretariadu Jerál CNE ne’e kompostu hosi funsionáriu públiku ne’ebé regula ona hosi Lei Órgaun Administrasaun Eleitorál no Lei funsaun públika no la presiza tan regula ho Lei seluk ida.

Paresér hosi Komisaun Funsaun Públika (CFP-sigla portugés) no nia asesór legál sira, katak Sekretariadu Jerál CNE nian basta regulariza ho rejimentu internu de’it tanba CNE nu’udar órgaun independente ida.

CNE nia rekomendasaun aumenta tán pontu ida iha artigu rejista partidu politiku foun tanba prezensa CNE nian importante hodi garante kumprimentu ba Lei partidu polítiku. Sein prezensa CNE nian sei hamosu polémika boot, tanba dadus referénsia anteriór hodi tais partidu polítiku foun laiha.

“Iha-ne’e sei hamosu dúvidaz rua; ida, partidu polítika foun sei mosu bara-barak no rua mak se obriga diminui ou impede, kontra vontade interasadu sira,” Prezidente CNE hateten.

CNE nia paresér ne’e fundamenta STAE hamriik bazea ba lei nú 7/2016, tanba ne’e la presiza tán lei seluk hodi regula maibé ho de’it dekretu govemu tanba STAE sub-tutela ba MAE nu’udar diresaun jerál ida.

Tuir CNE nia hanoin, aprezentasaun lista kandidatura mai CNE tanba prosesu ne’e liga ho aktu administrativu, karik fó tan Supremu Tribunál ba Justisa (STJ) hatodan tán servisu STJ nian.

Konseitu ne’e tuir ona modelu Paízes CPLP nian ne’ebé ho kondisaun tribunál oioin espesializadu, ao pasu ke Timor Leste tribunál sira la efikas iha desizaun tanba sub-karregadu.

Iha esperiénsia nasaun balun aprezenta ba STJ tanba nasaun sira refere eziste Órgaun Administrasaun Eleitoral ida de’it. Esperiensia iha mós nasaun (hanesan Indonézia, Tailándia no Koreia Súl no Filipina) CNE mak simu lista kandidatura sira, Tribunal só válida de’it rezultadu la’ós administra no hala’o hotu prosesu administrasaun bázika.

CNE nia paresér solisita ba Parlamentu Nasional ho Governu hodi halo alterasaun ba Lei 6/2016 hodi aplika sansaun administrativa ka penál ba eleitór ne ebé rejeita resensea sira nia-aan.

Paresér lubuk ne’e Prezidente CNE Alcino de Araújo Baris fó ona ba Komisaun A ne’ebé trata asuntu Justisa no Konstitusionál iha loron tersa ne’e, iha Parlamentu Nasionál.

Jornalista: Evaristo Soares Martins

Editór: Cancio Ximenes

 

HAKEREK NO HATÁN

Please enter your comment!
Please enter your name here