Prezidente CNE, Alcino de Araújo Barris . Imajen TATOLI/Egas Cristovão.

DILI, 22 juñu 2021 (TATOLI)—Prezidente Komisaun Nasionál Eleisaun (CNE-sigla portugés), Alcino de Araújo Barris, hateten sei aumenta tan sentru votasaun nune’e fasilita taxa partisipasaun eleitór sira maibé atu aumenta ne’e Governu mak sei propoin.

Notísia Relevante: Governu propoin aplika sentru votasaun paralelu iha eleisaun prezidensiál

“Governu mak propoin atu aumenta tan sentru votasaun ne’e, nune’e bele fasilita ema ne’ebé hela ka halo atividade iha Dili. Labele hanoin dehan aumenta fatin votasaun hodi ema vota tuir ita, la’e. Maibé, votu ne’e segredu tanba ohin ita bele hamriik hamutuk ko’alia hamnasa, tama ba, nia vota ba ita, la’e. Ne’ebé, ema-ne’ebé fasilita ita atu ba vota ne’e ita tenke agradese,” Alcino de Araújo Barris hateten ba Ajénsia TATOLI iha nia knaar fatin Colmera, Dili, tersa ne’e.

Aumenta sentru votasaun ne’e, nia dehan, atu fasilita eleitór sira tanba eleitór balun hela ho distánsia ne’ebé dook no liuliu estudante balun iha momentu eleisaun labele fila ba sira-nia knua atu tuir votasaun entaun tenke aumenta tan sentru votasaun.

“CNE preparadu halo revizaun no CNE konsege atu aumenta. Ba sira iha foho ne’ebá ne’e. karik okupadu ho servisu ruma, tenke hatama pedidu loron 20 antes votasaun, nune’e bele ezerse sira-nia direitu vota,” nia esplika.

Maibé ba sira-ne’ebé iha Dili no ema hotu-hotu liu-liu estuudante sira iha tendénsia mai iha kapitál ne’e, entaun ba sira-ne’e mak atu aumenta espesiál sentru votasaun ba sira, atu bele akomoda sira-nia partisipasaun iha votasaun. 

“Ita ba iha foho ne’e la haree estudante sira. Ita haree estudante iha Dili barak loos hanesan UNPAZ, UNTL, IOB no UNITAL, no universidade seluk ita la temi inklui estudante sekundária sira. Tanba ne’e presiza aumenta sentru votasaun atu fasilita ema sira-ne’e,” nia dehan.

Antes ne’e Governu propoin liuhosi proposta-lei alterasaun daneen ba lei eleitorál ba Prezidente Repúblika atu aplika sentru votasaun paralelu iha Munisípiu Dili, nune’e fasilita sidadaun sira ne’ebé la konsege ezerse direitu vota iha sira-nia hela fatin.

Notísia Relevante: CNE hato’o paresér ba PN kona-ba pakote lei eleitorál tolu

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here