Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (16/06). Imajen TATOLI/Egas Cristóvão

DILI, 16 juñu 2021 (TATOLI)—Reuniaun Konsellu Ministru (KM) iha kuarta ne’e, deside katak labarik sira ho idade 0-5 no idade 18 ba leten ne’ebé simu ona vasina kompleta (doze daruak) la presiza autorizasaun hosi Sentru Integradu Jestaun Krize (CIGC, sigla portugés) hodi sai hosi rejiaun impoin Serka Sanitária no sirkula iha territóriu tomak.

“Iha ámbitu Serka Sanitária, hatúr katak sidadaun sira ne’ebé maka kompleta ona vasina, presiza de’it hatudu prova vasinasaun hanesan sertifikadu vasinasaun no la presiza husu autorizasaun hosi Sentru Integradu hodi sai hosi munisípiu hirak ne’ebé sujeita hela Serka Sanitária,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha salaun auditóriu Ministériu Finansa, Aitarak-laran.

Enkuantu, munisípiu ne’ebé sei nafatin impoen Serka Sanitária mak munisípiu Dili, Baucau, Bobonaro no Covalima durante loron hitu tan.

Notísia relevante: Governu hakotu konfinamentu domisiliáriu no autoriza hikas movimentu transporte públiku

Nune’e, bandu nafatin sirkulasaun ema sira nian, entre munisípiu impoin Serka Sanitária no sirkunskrisaun administrativa sira seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públika.

Maski nune’e, labarik tinan-neen ba leten ne’ebé hakarak halo viajen bá munisípiu presiza karta autorizasaun.

“Individuu ka adultu sira ne’ebé simu ona vasina doze daruak, bele halo viajen ho labarik kiik hosi idade 0-5, maibé pesoál sira hosi idade 6 ba leten, bainhira atu halo viajen sai hosi munisípiu sira ne’ebé sujeita ba Serka Sanitária tenke halo teste swab ho rezultadu negativu maka bele hetan karta autorizasaun,” nia esplika.

Enkuantu, sidadaun sira ne’ebé vasina dala-rua ona la presiza hein to’o loron 14 ka semana rua mak halo viajen, maibé bele halo kedan viajen tama-sai fatin ne’ebé de’it iha territóriu nasionál.

“Ami pronúnsia desizaun Konsellu Ministru, entaun buat ne’ebé ami hato’o ba públiku la’ós intrepretasaun lei sira, maibé refleta mós hosi autór ba regra sira nian, entaun lejizladór nia intensaun ne’e iha valór a’as tebes, ne’ebé husu públiku lalika konfunde entre buat ne’ebé Konsellu Ministru fó sai tanba ida-ne’e maka a’as liu entidade hotu ne’ebé implementa,” nia subliña.

Ba inan isin-rua sira, tanba la autoriza hodi simu vasina, tenke halo teste swab ho rezultadu negativu COVID-19 mak bele sai hosi munisípiu ho Serka Sanitária.

KM deside mós katak reprezentante CIGC mak iha kompeténsia atu autoriza sidadaun halo deslokasaun bá munisípiu ne’ebé impoin Serka Sanitária, enkuantu Prezidente autoridade no administradór sira laiha kompeténsia halo autorizasaun.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here