Prezidente CNE, Alcino de Araújo Barris konvoka reuniaun kona ba plenária extraordinária alargada CNE- STAE-MNEC-MAE halo apresiasaun hamutuk kona-ba prosesu resensiamentu no votasaun iha diaspora iha salaun Lalini Lariguto, CNE, Dili, tersa (22/06). Imajen TATOLI/Egas Cristovão.

DILI, 22 juñu 2021 (TATOLI)—Komisaun Nasionál Eleisaun (CNE-sigla portugés), Sekretariadu Tékniku Administrasaun Eleitorál (STAE), Ministériu Negósiu Estranjeiru no Kooperasaun (MNEK) no Ministériu Administrasaun Estatál (MAE), tersa ne’e diskute prosesu resensiamentu eleitorál no votasaun diáspora.

Notísia Relevante: MAE-STAE halo preparasaun téknika Eleisaun Prezidensiál marsu 2022

Vise-Ministru Administrasaun Estatál (MAE), Lino de Jesus Torrezão, hateten resensiamentu eleitorál ne’e obrigatóriu ida tanba nia mandatu konstitusionál ne’ebé obrigatóriu halo resensiamentu eleitorál iha rai-laran no diáspora ka rai-liur.

Iha rai-laran klaru ke la’o maibé iha rai-liur mak ita sei hasoru difikuldade tanba fatin hotu-hotu infrenta hela pandemia COVID-19, maibé halo resensiamentu eleitorál iha rai-liur hanesan iha Irlandia, Inglaterra, Corea do Sul, Australia no Portugál, ne’e prioridade tenke halo resensiamentu eleitorál no baze dadus.

“Ohin, ita hahú resensiamentu eleitorál no semana oin ita sei halo lansamentu ba resensiamentu eleitorál iha Dili, tanba bainhira lansamentu no ita sei hahú ka inísia iha fulan setembru. Maibé ida-ne’e, tenke kria mekanizmu di’ak ida para oinsá resensiamentu ne’e la’o di’ak liután,” Lino de Jesus Torrezão hateten ba jornalista sira, iha salaun iha salaun Lalini Lariguto CNE, Colmera, Dili, tersa ne’e.

Nune’e, nia dehan, presiza halo koordenasaun ho Ministériu Negósiu Estranjeiru no Kooperasaun (MNEK) atu halo negosiasaun di’ak ba país ne’ebé Timor-Leste atu ba halo resensiamentu eleitorál ne’e.

“Ita atu ba país ne’ebé iha atu ba halo resensiamentu eleitorál ne’e simu ita ka lae, tanba pandemia COVID-19. Maibé dokumentu ne’ebé ita atu lori mak kartaun vasina kompleta ba doze daruak nian. Maibé la automatikamente ita to’o ba la hela kuarentena maibé ita bele husu halo negosiasaun atu ita iha kuarentena másimu loron lima,” nia dehan.

Tuir governenate ne’e katak, resensiamentu eleitorál ne’e obrigatóriu maibé vota ida-idak nia hakarak no la obriga tanba vota konsiénsia ema ida-idak nian.

Entretantu Diretór Jerál Ministériu Assuntu Konsular, Protokolu no Mídia (DGACPM-sigla portugés), Ministériu Negósiu Estranjeiru no Kooperasaun (MNEC), José António Amorim Dias, hateten daudaun ne’e país balun sei kontinua implementa konfinamentu obrigatóriu ba moras COVID-19 maibé MNEC kontinua rekolla dadus eleitór sira iha nasaun oioin ne’ebé realiza eleisaun prezidensiál.

“Funsionáriu MNEC iha estranjeinru preparadu atu realiza resensiamentu eleitorál iha inísiu setembru tinan ne’e,” nia dehan.

Entretantu Diretór Jerál STAE, Alcilino Branco hateten, tuir lei resensiamentu eleitorál katak sé mak iha kompeténsia resensiamentu iha rai-liur ne’e atribui ba MNEC no STAE fó apoiu de’it no atividade hotu-hotu superviziona hosi CNE.

“Ita-nia resensiamentu eleitorál ne’ebé hala’o iha Timor ne’e hahú 01 jullu no sei ramata iha janeiru 2022. Entaun ho ida-ne’e ita mós hakarak garante hanesan ba ita-nia sidadaun sira iha rai-liur. Tanba ne’e, ohin mai atu partilla esperiénsia ba planu realizasaun resensiamentu refere. Kalendáriu resensiamentu eleitorál iha rai-liur hahú setembru maibé ita propoin ba MNEC ho ninia atribuisaun tenke hato’o ba órgaun eleitorál mak ita ajusta nia preparasaun sira kona-ba fatin atendementu tanba ita presiza hatene fatin nafatin hanesan iha 2017 ka ita sei aumenta tan,” nia dehan.

Kona-ba asuntu ida-ne’e, Diretór STAE hateten, MNEC mak hatene liu asuntu ne’e tanba ne’e parte órgaun bele halo preparasaun tuir ida-ne’e. Tanba, bainhira halo resensiamentu eleitorál iha rai-liur, presiza halo uluk inskrisaun konsuladu tanba sidadaun iha rai-liur mós barak.

Nia dehan totál eleitorál iha rai-liur hamutuk 6.000 no Timor-Leste iha eleitorál 839.420-resin.

Kona-ba osan, nia dehan presiza informasaun hosi MNEC kona-ba fatin realizasaun resensiamentu eleitorál mak foin halo kálkulu ba osan.

“Agora presiza hatene uluk lai nesesidade nune’e ita hein rezultadu hosi MNEC. Ohin ami koordena ona semana oin ita sei tuur hamutuk hodi halo kálkulu ida. Maibé, ita mós presiza informasaun hosi MNEC katak país ne’ebé mak ita realiza ne’e iha país ne’ebé-ne’ebé no nia regalia ruma. Tanba, ita ba mak tama kuarentena entaun ita presiza hatene parte lojístika nian. Ida-ne’e nia rezultadu hetan hotu mak ita foin halo kálkulu ba osan,” nia dehan.

Notísia Relevante: CNE-STAE halo levantamentu ba empreza gráfika atu emprime bulletin votu

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here