Ró-ahi KMP Tranship II atu atraka iha Portu Dili, sábadu (12/06). Imajen TATOLI/Antónia Gusmão.

DILI, 21 juñu 2021 (TATOLI)—Reprezentante povu iha uma fukun Parlamentu Nasionál (PN) sei halo interpelasaun ba Governu hodi husu justifikasaun ba Ministru Transporte no Komunikasaun, José Agostinho da Silva, kona-ba kontratu ró-ahi KMP Tranship II.

Xefe Bankada Kmanek Haburas Unidade Nacional Timor Oan (KHUNTO), Deputadu Olinda Guterres, hateten atu habadak deklarasaun polítika kona-ba korrupsaun kona-ba ró-ahi KMP  Tranship II tenke fó xamada ba ministru refere.

Notísia Relevante: Polémika ró-ahi Tranship II, PM respeita prezunsaun inosénsia

“Di’akliu ita fó xamada ba Ministru Transporte no Komunikasaun José Agostinho da Silva, nune’e mai esplika. CAC ne’e só bolu mak ema-ne’ebé halo korrupsaun, maibé ida-ne’e la’ós korrupsaun. Tanba orsamentu ne’ebé foin dadaun ne’e, ró ne’ebé atu substitui ne’e. Ami KHUNTO ne’e seidauk halo korrupsaun no ami-nia liman seidauk fo’er. Ami (KHUNTO) mai atu serví la’ós mai atu ukun,” Xefe Bankada KHUNTO ko’alia kestaun ne’e relasiona ho polémika kontratu ró Tranship II, segunda ne’e.

Iha parte seluk, Xefe Bankada FRETILIN, Deputadu Francisco Miranda Branco, hateten kestaun ró-ahi KMP tranship II ne’e, deputadu sira bele halo interpelasaun ba Governu.

“Ha’u hanoin ita iha instrumentu rejimentál katak ita bele uza artigu 152 no 153 hodi bolu ministru mai Parlamentu Nasionál. Se kestaun ne’e relevante ba interese nasionál, ita bele halo interpelasaun duké ita halo polítiku ba ida-ne’e. CAC ne’e kestaun seluk. Se CAC mak kaer ona prosesu ida-ne’e, husik CAC kaer ba maibé ita hanesan deputadu ita uza instrumentu rua artigu 152 no 153, se karik ne’e interese nasionál,” Xefe Bankada FRETILIN ne’e propoin.

Entretantu, Reprezentante Bankada CNRT, Deputadu Domingos de Carvalho liuhosi deklarasaun polítika hateten ró-ahi Tranship II ne’ebé aluga hosi Indonézia konforme hosi fiskalizasaun Komisaun E Parlamentu Nasionál iha indisiu forte krime korrupsaun, tanba deskonfia iha prosesu aprovizionamentu no ajudikasaun mosu irregularidade barak no envolve Ministru Transporte no Komunikasaun.

Tuir informasaun ne’ebé Bankada CNRT rekolla iha loron 18 fevereiru 2021 katak, foufoun deside kontratu rihun $150, maibé derrepente folin aluga ró-ahi Tranship ne’e sa’e ba rihun $220.

“Konforme fiskalizasaun ba ró-ahi Tranship II, Komisaun E Parlamentu Nasionál haree fizikamente ró ne’e la viável atu halo operasaun tanba sasán barak kesi de’it ho tali-rafia, besi barak mak ferujen no dodok ona, oléu sai hosi mákina ró-ahi, kadeira besi mamuk (la uza esponza) inklui mós idade téknika ró-ahi ne’e kleur ona tanba produsaun iha tinan 2007, produtu tinan 14 liubá nian,” deklarasaun polítika Bankada CNRT.

Bankada CNRT husu CAC no Ministériu Públiku atu investiga Ministru Transporte no Komunikasaun, investiga mós parte relevante sira-hotu iha prosesu aprovizionamentu no ajudikasaun ró-ahi KMP Tranship II ne’ebé fó ona prejuízu ba osan Estadu.

“Indikasaun forte mark-up (hasa’e) folin aluga ró-ahi, no ró-ahi ne’e kondisaun ladi’ak nune’e sei fó ameasa ba seguransa pasajeiru nian. Iha prosesu investigasaun ida-ne’e, husu ba Governu atu hapara lai operasaun ró-ahi KMP Tranship II to’o iha desizaun finál hosi Tribunál,” nia dehan.

Tuir Rejimentu Parlamentu Nasionál (RPN) Artigu 152 (Debate ho ministrú sira) númeru 1 hateten, ministru idak-idak mai iha Plenáriu nia oin, pelu menus dala-ida iha kada sesaun lejizlativa, ba debate ho Parlamentu.

Númeru 2 hosi artigu ne’e hatutan, debate bele fora ba área hotu-hotu ne’ebé ministru ne’e kaer no númeru 3 hosi artigu ne’e mensiona, prezidente rona tiha Konferénsia Reprezentante Bankada Parlamentár sira-nian, fulan ida antes, fixa data hodi hala’o debate sira-ne’ebé temi iha númeru anteriór.

Nune’e mós artigu 153 (Debate kona-ba asuntu relevante ba interese nasionál), númeru 1 katak, rekerimentu hosi deputadu na’in-10 ka bankada parlamentár, bele halo debate kona-ba asuntu relevante ba interese nasionál no númeru 2 hosi artigu ne’e dehan, debate ne’e hala’o iha loron 10 nia laran, sura hosi data ne’ebé halo pedidu.

Hatán ba kestaun ne’e, Ministru ba Asuntu Parlamentár no Komunikasaun Sosiál (MAPKOMS) Francisco Jerónimo, konsidera deklarasaun polítika bankada CNRT nian pertinente tebes tanba ne’e presiza rezolve liuhosi dalan polítika no dalan legál.

“Dalan polítika bele bolu ministru mai iha Parlamentu Nasionál atu deputadu sira bele halo debate ho nia, maibé lei (dalan legál) sei ba hasoru ho lei liuhosi Ministériu Públiku no tribunál,” nia hateten.

Notísia Relevante: Rezultadu inspesaun ró-ahi KMP Tranship II kondisaun di’ak halo operasaun

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here