Ministru Transporte Komunikasaun, José Agostinho da Silva. Imajen TATOLI/Egas Cristóvão

DILI, 08 juñu 2021 (TATOLI)–Ministru Transporte Komunikasaun (MTK), José Agostinho da Silva, hateten, bazeia ba rezultadu inspesaun Diresaun Nasionál Transporte Marítima (DNTM), katak ró KMP Tranship II iha kondisaun di’ak atu halo operasaun.

“Ró foun to’o iha semana kotuk, tuir regra antes halo operasaun tenke halo inspesaun hosi orgaun kompetente hanesan Diresaun Nasionál Transporte Marítima, tanba ne’e bainhira halo inspesaun no haree ba kondisaun ein termu seguransa no dokumentu sira, konklui no halo relatóriu tékniku katak ró ne’e seguru halo movimentu atende sidadaun, liu-liu populasaun iha enklave Oé-cusse no Ataúro,” Ministru dehan hafoin ramata enkontru ho Primeiru-Ministru, Taur Matan Ruak, iha Rezidénsia Farol, tersa ne’e.

Notísia relevante: Ró-ahi KMP Tranship II halo operasaun kada semana dala-ida

Ró-ahi KMP Tranship II hosi Surabaya, Indonézia to’o iha Dili no atraka iha portu iha loron 25 maiu, hodi subtitui ró-ahi Berlin Nakroma no Success, ne’ebé atu halo manutensaun.

Governu liuhosi MTK halo kontratu ho kompañia estranjeiru hosi Indonézia hodi bele opera ró-ahi ne’e iha Timor-Leste, ne’ebé sei halo operasaun semana ida dala-ida, iha segunda ho destinasaun Oé-cusse-Dili-Ataúro no Dili-Oé-cusse-Ataúro.

Hafoin halo inspesaun hosi DNTM, maka faze tuir mai tenke kumpre regra sanitária, ne’ebé tripulante tomak halo teste swab no kumpre kuarentena.

“Tripulante sira halo teste swab dala-rua ona ho rezultadu negativu, signifika katak seguru no tuir regra sanitária no protokolu Organizasaun Mundiál Saúde (OMS). Ha’u hanoin ein termu rekezitu atu halo movimentu halo atendimetu sira, ró ne’e prenxe ona rekezitu,” nia akresenta.

Tuir Ministru, Governu iha nesesidade aluga ró ne’e hodi fasilita movimentu sidadaun via marítima.

“Diretór ró-ahi Success halo ona karta mai ha’u hodi prepara halo manutensaun tanba ne’e laiha ró seluk subtitui maka movimentu marítima fakum ona, tanba ne’e Governu halo kontratu ró foun,” nia hatutan.

Ministru mós klarifika, aluga ró-ahi la’ós programa ne’ebé foin hamosu maibé programadu ona antes ne’e.

“Ne’e programadu ona no orsamentu aseguradu iha orsamentu,” nia tenik.

Nia haktuir, esperiénsia ne’ebé iha, kuandu ró ida atu halo manutensaun, nia orsamentu prevee ona no iha ró balun atu subtitui.

“Situasaun aluga ró ne’e ita ezekuta osan ne’ebé aseguradu no aprovadu ona iha Parlamentu Nasionál,” nia informa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here