Primeiru-Ministru, Taur Matan Ruak. Imajen TATOLI/Francisco Sony

DILI, 18 juñu 2021 (TATOLI)–Primeiru-Ministru (PM), Taur Matan Ruak, hateten seidauk bele foti desizaun ruma ba Ministru Transporte no Komunikasaun (MTK), José Agustinho da Silva, relasiona ho polémika ró-ahi KMP Tranship II.

Xefe Governu dehan, nia parte labele ezonera ema arbiru no tenke iha fundamentu ruma, maski kazu ne’e envolve ona Komisaun Antí Korrupsaun (CAC, sigla portugés).

Notísia relevante: CAC halo inspesaun ba ró-ahi KMP Tranship II

“Prosesu la’o, naturalmente sé mak falla iha responsabilidade, hanesan mós ha’u-nia ministru no seluk, labele tur ba halo senteza iha li’ur tanba ita-nia Konstituisaun fó prezunsaun inosénsia ne’e importante, nasaun ida bainhira demokrasia atu funsiona ho di’ak, tenke kumpre pruzunsaun inosénsia,” PM hateten iha ninia Rezidénsia ofisiál Farol, sesta ne’e.

Xefe Governu hato’o lia hirak ne’e, relasiona ho deklarasaun hosi sosiedade sivíl ne’ebé ezije atu ezonera Ministru Transporte no Komunikasaun.

Notísia relevante: FONGTIL husu Primeiru-Ministru kansela kontratu ró Tranship II

Governu liuhosi MTK halo ona kontratu ho kompañia Atralata Estrategi hosi Indonézia hodi bele opera ró-ahi KMP Tranship II iha Timor-Leste.

Kontratu ho kompañia estranjeiru ne’e, kada fulan $220.000, ho ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here