CAC halo inspesaun ba ró Tranship II Gresik Indonézia iha Portu Dili, foin lalais ne'e. Imajen/CAC

DILI, 14 juñu 2021 (TATOLI)-Forum Organizasaun Naun Governamentál Timor-Leste (FONGTIL) husu Primeiru-Ministru (PM), Taur Matan Ruak, kansela kontratu ró Tranship II, ne’ebé halo hodi substitui ró Nakroma iha Timor-Leste.

Notísia Relevante : Rezultadu inspesaun ró-ahi KMP Tranship II kondisaun di’ak halo operasaun

Ró Tranship. Imajen/CAC

Diretór Ezekutivu FONGTIL, Daniel Santos do Carmo hateten, FONGTIL rekomenda ba Xefe Governu atu kansela kontrstu no operasaun  ró Tranship II iha Timor-Leste tanba informasaun ne’ebé FONGTIL asesu katak ró refere fó prejuizu ba Estadu Timor-Leste.

“Ami kestiona kona-bá Ró Tranship II atu PM kansela tanba ró refere fó prejuizu ba Estadu Timor-Leste, tanba informasaun ne’ebé ami hetan gastu ba mina bainhira viajen ba Rejiaun Administrativa Espesiál Oé-Cusse Ambeno (RAEOA) ka Atauro gastu litru 31.000 no rendimentu hosi kada viajen hetan de’it $5.000 ka $6.000, agora prosesu aluga ró refere kada fulan $220.000, entaun kompara rendimentu ho osan ne’ebé ita hasai ba aluga ho mina ida ne’e ita haree la balansu,” Daniel Santos do Carmo, haktuir liuhosi konferénsia imprensa iha sede FONGTIL Caicoli, Dili, segunda ne’e.

FONGTIL konsidera katak ró Transship II fó prejuizu ba Estadu no Estadu mós lakon tanba osan ne’ebé hasai ba selu de’it ró montante boot liu kompara hetan rendimentu ne’ebé tama, entaun haree ba ida ne’e kategoria krime.

“Kondisaun ró Transship II la seguru hodi halo viajen hanesan públiku akompaña, viajen hosi Dili, Atauro nia han oras haat kedas, kompara ró SUCSSES no ró Nakroma ne’ebé halai ho oras ida ho balu de’it,” nia dehan.

Notísia Relevante : PM agradese ultrapasa difikuldade bá Ataúro ho ró-ahi Tranship II

Diretór Ezekutivu FONGTIL, Daniel Santos do Carmo. Imajen Tatoli/Egas Cristovão

Nia hatutan, FONGTIL nia lamentasaun ida seluk mak PM utiliza ró refere ba halo servisu no perigu ba seguransa. Nune’e, FONGTIL kestiona servisu protokolu Primeiru-Ministru nian, ne’ebé la haree ba ró nia kondisaun hodi halo Primeiru-Ministru mós sai vítima bainhira halo viajen ba-mai Atauro iha loron hirak liubá.

“Husu Polísia Nasionál Timor-Leste (PNTL) atu investiga protokolu Primeiru-Ministru nian, ne’ebé la halo identifikasaun ba kondisaun ró refere, lori Primeiru-Ministru ba sa’e ró ne’ebé kondisaun la seguru tanba ami identifika katak ró nia kondisaun la ladi’ak kesi ho tali ráfia, no ólio turuk ka sai hela, ida ne’e la merese halo movimentu iha ita-nia rai,” nia afirma.

Bazeia ba lakon ka prejuizu sira ne’ebé análiza hosi dadus ne’ebé FONGTIL asesu mak FONGTIL rekomenda ba Komisaun Anti Korupsaun (CAC-sigla portugés), atu kansela aluga Ró Tranship II ne’e, no husu ba CAC hasai despaixu hodi kanela Ró ne’e halo movimentu tanba sei prejudika seguransa ba vida populasaun ne’ebé uza Ró refere.

“Ami mós husu ba CAC atu halo kapturasaun imediata ba Ministru Transporte Telekomunikasaun Obra Públiku ho nia Diretór sira tanba konsidera ida ne’e hanesan fragante delitu tuir prosesu kódigu penál artigu 219,” nia subliña.

CAC trava operasaun

Komisaun Anti-Korrupsaun (CAC, sigla portugés) liuhosi sira-nia inspesaun ba ró Tranship II Gresik Indonézia, foin lalais ne’e, nota katak kondisaun ró nian ladun seguru no husu ona ba Governu liuhosi Ministériu Transporte no Komunikasaun (MTK) ne’ebé lidera hosi Ministru Jóse Agostinho, atu trava ka hapara lai operasaun ró ne’e nian.

Liuhosi publikasaun CAC nian iha pájina ofisial CAC nian iha Facebook (Comissao Anti Corrupcao CAC TimorLeste), Komisáriu Adjuntu CAC ba Asuntu Prevensaun no Sensibilizasaun, Luis de Oliveira Sampaio, orienta ona ekipa prevensaun korrupsaun hodi hala’o inspesaun ba ró Tranship II Gresik Indonesia ne’ebé Governu liuhuosi MTK aluga hodi substitui Berlin Nakroma no Success ne’ebé avaria.

Iha prosesu inspesaun ne’e CAC rekomenda ba Ministru MTC, José Agostinho hosi partidu KHUNTO atu temporariamante suspende operasaun tanba iha prosesu aprovizionamentu aluga ró Tranship II hamosu dúvida no fatal tebes ne’ebé bele prejudika funsionáriu públiku MTK sira bainhira Governu kontinua deside halo operasaun ba ró ne’e.

Baze legal ne’ebé gia CAC rekomenda ba MTK atu suspende temporariamante operasaun ró Tranship II Gresik mak CAC nu’udár instituisaun independente ne’ebé hala’o nia knaar atu prevene no kombate krime korrupsaun tuir mandatu ne’ebé hatuur ona iha Lei Nú. 8/2009 kona-ba Kriasaun CAC.

Iha artigu 5 Lei Kriasaun CAC, define katak CAC iha kompeténsia atu halibur (rekolla) no analiza informasaun hirak ne’ebé relasiona ho kauza sira ba korrupsaun no fó-hanoin (akonsella) ba kualkér instituisaun ka entidade públika sira kona-bá oinsá prevene no luta hasoru hahalok korrupsaun.

Iha artigu 9 Dekretu Lei Nú. 23/2015 kona-bá Estrutura Orgánika CAC, define katak Unidade Inspesaun no Monitorizasaun (UIM) responsavel ba apoiu partisipasaun no sensibilizasaun sosiál no emprezariál no mós monitorizasaun situasaun indikadu korrupsaun iha administrasaun direita no indireta Estadu.

Aleinde ne’e, iha Lei Medida Prevensaun no Kombate Korrupsaun (MPCC), partikularmente iha artigu 7 kona-bá publisidade no transparénsia servisu aprovizionamentu iha setór públiku no artigu 8 kona-bá aprovizionamentu ne’ebé justu no efisiente, fó espasu ne’ebé boot ba servisu prevensaun CAC atu intervein no asegura prosesu sira tuir prinsípiu sira ne’ebé lei define tiha ona.

Bazeia ba legalidade ida ne’e CAC hala’o prosesu inspesaun ró foun ne’e semana kotuk ho ninian deskobrimentu sira revela iha relatóriu katak iha duni irregularidade prosesu aprovizionamentu.

Maske nune’e, MTC liu hosi Diresaun Nasional Transporte Marítima (DNTM) nu’udar autoridade ne’ebé ezekuta mandatu bazeia ba nomeasaun hosi Diretór DNTM ho númeru ofísiu: MTC/098/DNTM/VI/2021 – data 01/06/2021 ho asuntu nomeasaun inspesaun téknika ba ró-ahi Success no MTC/100/DNTM/VI/2021, datada 02/06/2021 ho asuntu nomeasaun inspesaun téknika ba Transip II.

Rezultadu inspesaun MTK nian kontráriu ho sá mak CAC hetan iha terrenu. CAC lori ona dadus ba kruza vervalmente ho Diretor Nasional ba Transporte Marítima. CAC rekomenda ona atu halo komparasaun no MTK halo re-inspesaun fali tuir dadus CAC nian.

“CAC estuda hela no kruza informasaun sira ne’e. Tanba prosesu sira la’o daudauk ne’e buat hotu sira halo tiha (lori tiha ró ne’e mai Timor halo tiha kontratu ho ró ne’e) depois mak foin halo prosesa selebra kontratu. Kontratu halo tiha ona mak foin orienta halo prosesu aprovizionamentu. Ida ne’e mak fatal liu,”  Komisáriu Adjuntu Luis Sampaio afirma, liuhosi publikasaun CAC nian iha pájina Facebook.

Tuir dadus ne’ebé iha hatudu rezultadu inspesaun MTK nian revela totalmente kontráriu ho rezultadu inspesaun CAC nian. MTK fó buat di’ak de’it, CAC no mídia mós iha oin hotu.

“MTC koko CAC,  mais, CAC ninia inspesaun ne’e kontráriu. Liu-liu buat ida substánsia liu mak iha prosesu aprovizionamentu ne’e,” Luis Sampaio afirma.

Informasaun adisionál ne’ebé ekipa inspesaun prevensaun CAC nian hetan iha terrenu revela ró Tranship II Gresik ninian produsaun tinan 2007 no ró Success ne’ebé hala’o tiha ona ninian operasaun iha Timor tinan hirak nian laran fabrika iha tinan 2017.

CAC haree katak roo ne’e rasik oli suli hela iha ne’ebé perigu tebes ba ró no pasajeiru-sira nian salvasaun vida. Lampu sira mós kesi ho tali ráfia no AC ró nian aat hodi uza fali AC ne’ebé atu instala de’it ba iha uma nian.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here