Primeiru-Ministru, Taur Matan Ruak, simu vasina AstraZeneca doze daruak, iha Rezidénsia ofisiál Farol, sexta (18/06). Imajen TATOLI/Francisco Sony

DILI, 18 juñu 2021 (TATOLI)–Primeiru-Ministru (PM), Taur Matan Ruak, hamutuk ho espoza, iha sesta ne’e, simu ona vasina ho tipu AstraZeneca doze daruak iha ninia Rezidénsia Ofisiál Farol.

“Ha’u kompleta ona vasina no ha’u bebas ona, ha’u bele ba ne’ebé de’it la swab ona,” PM Taur, hateten, hafoin simu vasina.

Notísia relevante: Governu deklara sidadaun simu vasina kompleta livre sirkulasaun sein teste

Biban ne’e, PM hato’o saudasaun espesiál ba ekipa liña frente sira ne’ebé apoia ona kampaña vasinasaun.

Xefe Governu apela ba populasaun atu partisipa iha prosesu kampaña vasina nasionál, tanba fó dalan salva vida no avansa fali ba normalizasaun hodi ajuda rekupera ekonomia.

Primeiru-Ministru, Taur Matan Ruak, hamutuk ho nini espoza, Isabel da Costa Ferreira, simu vasina AstraZeneca doze daruak integra ona iha Sistema Saúde, iha Rezidénsia ofisiál Farol, sexta (18/06). Imajen TATOLI/Francisco Sony

“Husu ba hirak ne’ebé seidauk vasina labele dúvida, uluk tanba dúvida maka ha’u sona uluk, maibé ha’u la mate, agora sira tauk halo saida, ne’ebé labele iha dúvida no kontinua koopera nafatin ho profisionál saúde, tanba sira-nia misaun mak salva ema-nia vida iha situasaun sira hanesan ne’e kuandu iha moras oho ema, ita iha dalan-rua de’it, fiar Maromak no fiar médiku sira,” Taur apela.

Notísia relevante: PM Taur simu ona vasina dahuluk

Nune’e, Xefe Ezekutivu husu populasaun atu kontinua rona no koopera ho profisionál saúde sira.

Primeiru-Ministru, Taur Matan Ruak no espoza, Isabel da Costa Ferreira, simu vasina AstraZeneca doze daruak. Iha Farol Sexta (17/06). Imajen Tatoli/Francisco Sony

“Ha’u kontente loos semana ikus ne’e númeru partisipasaun vasina sa’e, ne’e di’ak tebes, Governu kontinua nafatin halo esforsu ajuda profisionál saúde, tanba sira determinadu lori prosesu ne’e la’o ba oin hodi salva ema-nia vida, normaliza nasaun no fasilita rekupera ekonomia, se lae ita-nia vida ekonómika bele paradu. Ha’u fiar katak sira ne’ebé sei dúvida loron ida sei se kabas atu profisionál saúde sira vasina,” PM otimista.

Eis Prezidente Repúblika iha esperansa katak Governu liuhosi Ministériu Saúde bele hetan tipu vasina ne’ebé bele vasina sidadaun ho idade menus hosi 18.

Jornalista : Antónia Gusmão

Editora     : Julia Chatarina  

HAKEREK NO HATÁN

Please enter your comment!
Please enter your name here