Primeiru-Ministru, Taur Matan Ruak, simu vasina kontra COVID-19 iha Sentru Saúde Bairro Formosa, kuarta (07/04). Imajen TATOLI/António Gonçalves

DILI, 07 abríl 2021 (TATOLI)—Timor-Leste ofisialmente lansa vasina dahuluk kontra COVID-19, ne’ebé Primeiru-Ministru (PM), Taur Matan Ruak, simu ona vasina ho tipu AstraZeneca hanesan rekomendasaun Organizasaun Mundiál Saúde (OMS).

Aleinde ne’e, Prezidente Parlamentu Nasionál (PPN), Aniceto Guterres, Premeadu Nobel da Paz, José Ramos Horta, membru Parlamentu Nasional no membru Governu balun, inklui membru Sala Situasaun-Sentru Integradu Jestaun Krize (CIGC, sigla portugés) partisipa mós iha vasina faze dahuluk ne’e.

Prezidente Parlamentu Nasionál, Aniceto Guterres, simu vasina kontra COVID-19 iha Sentru Saúde Bairro Formosa, kuarta (07/04). Imajen TATOLI/António Gonçalves

“Ha’u oferese ha’u-nia an sai ema dahuluk simu vasina, embora Prezidente Parlamentu Nasionál, Aniceto Guterres, ema daruak, no ha’u husu Prezidente Repúblika karik médika sira autoriza atu simu iha ikus liu para taka,” PM Taur relata liuhosi diskursu iha ámbitu seremónia lansamentu vasina AstraZeneca ne’ebé realiza iha Sentru Saúde Bairro Formosa, kuarta ne’e.

Notísia relevante: Vasina hahú aban, PM prontu simu dahuluk

Tuir Xefe Governu, ohin loron espesiál tebes ba Timor-Leste tanba hahú vasina no konsidera vasina importante, tanba ne’e presiza partisipasaun ema hotu tanba laiha ema ida mak sei livre enkuantu ema hotu seidauk livre COVID-19.

Governu ofisiálmente lansa vasina nasionál kontra COVID-19 iha Sentru Saúde Bairro Formosa, kuarta (07/04). Imajen TATOLI/António Gonçalves

“Atu livre hosi COVID-19 dalan ida mak vasina, tanba Timor-Leste define meta ida katak tinan ne’e nia rohan sidadaun sira bele vasina hotu,”

Remesa dahuluk vasina to’o 20%, ne’ebé sistema Nasaun Unida liuhosi COVAX Facility mak fasilita mai Timór.

“Governu tenke serbisu maka’as atu asesu vasina 80% atu kompleta meta ne’ebé define iha ambisaun ne’ebé hakarak hetan vasinasaun kompletu iha tinan ne’e nia laran,” nia akresenta.

Xefe Ezekutivu dehan, Timor-Leste halo ona esforsu boot durante tinan ida atu asesu ba vasina, ho apoiu hosi parseiru no finalmente bele asesu ba faze dahuluk.

“Aproveita oportunidade ida-ne’e hakarak agradese partisipasaun no kontribuisaun Organizasaun Mundiál Saúde, UNICEF, nasaun amigu sira, inklui Embaixada iha Timor-Leste ne’ebé hamutuk ho Timor-Leste serbisu maka’as atu evita dezenvolvimentu COVID-19 iha labele halai ses hosi kontrolu ita-nia,” nia hatutan.

Ekipa saúde hatudu ekipamentu vasina molok halo lansamentu vaksina AstraZeneca iha Sentru Saúde Bairro Formosa, kuarta (07/04). Imajen TATOLI/António Gonçalves

Xefe Governu haktuir, atu atinje vasina to’o 80%, maka nia parte halo ona pedidu ofisiál ba ninia omólogu Primeiru-Ministru Austrália no Primeiru-Ministru Xina atu apoia asesu ba vasina.

Nune’e mós, iha proposta orsamentu retifikativu, Governu prevee ona millaun $35 ba kustu vasina atu kobre ba populasun tomak.

“Ha’u husu komisaun interministeriál COVID-19 ne’ebé lidera hosi Vise-Primeira Ministru, bele serbisu ho parseiru sira hanesan OMS, UNICEF hodi ita bele atinje meta,” nia katak.

Iha faze dahuluk vasina sei kobre populasaun 8%, ne’ebé 3% korresponde ba traballadór liña frente, liuliu funsionáriu sira ne’ebé serbisu iha unidade kuarentena no izolamentu, ka iha postu entrada hanesan aeroportu, portu no terrestre, no 5% sei abranje ba populasaun ne’ebé hela iha área besik fronteira terrestre no ema sira ne’ebé konsidera risku ba kontaminasaun.

Iha faze daruak, sei abranje populasaun 12%, inklui sidadaun sira ne’ebé ho idade 60, liuliu sira ne’ebé hela iha Rejiaun Administrativa Espesiál Oé-cusse Ambeno (RAEOA), iha Dili, Covalima no Bobonaro.

Aleinde ne’e, iha faze daruak sei abranje mós, profisionál saúde, profesór, pesoál restaurasaun, loja no merkadu sira, pesoál konfisaun relijioza sira, no líder komunitáriu no polítiku sira ne’ebé hela iha RAEOA, Dili, Covalima, no Bobonaro.

Grupu sira ne’ebé integra iha faze datoluk hamutuk 80% populasaun ne’ebé hela iha Timor-Leste, ne’ebé sei define konstante ba evolusaun klíniku nasionál sira no ritmu fornesimentu vasina.

Vasina ne’e sei efetua iha estabelesimentu Servisu Nasionál Saúde, ne’ebé sei aloka ekipa treinada vasinasaun sira, hodi haree espesifikasaun vasina kontra COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here