Pesoál saúde fó vasina ba sidadaun iha sentru saúde iha Dili. Imajen TATOLI/António Gonçalves

DILI, 28 maiu 2021 (TATOLI)—Primeiru-Ministru (PM), Taur Matan Ruak, deklara, sidadaun ne’ebé mak simu ona vasina kontra COVID-19 ho doze kompletu (dala-rua), livre halo sirkulasaun.

“Vasina kontinua hala’o atu redúz risku kontájiu vírus ne’e, tanba ne’e Governu deside sidadaun ne’ebé simu vasina kompleta, bele livre halo sirkulasaun ba fatin ne’ebé de’it sein halo teste swab. Entaun fulan oin ema barak kompleta ona simu vasina no barak mós sei halo movimentu bá-mai ho livremente,” Xefe Governu hateten iha ámbitu debate renovasaun Estadu Emerjénsia da-XIV iha sala plenária Parlamentu Nasionál, sesta ne’e.

Xefe Ezekutivu hatutan, estratejia vasina inisialmente  hosi Ministériu Saúde (MS) atu haree uluk grupu risku, define kritériu, no halo prioridade, maibé susar no lori tempu naruk.

“Sosiedade Timór ne’e iha grupu tolu, grupu ida mak ne’ebé aseita, grupu ida duvidozu no grupu ida atrazadu. Ida atrazadu ka lakohi ne’e husik ba ikus liu, kuandu nia  lakohi ne’e husik ba ne’e problema ninian, ita (Governu) la fó mak ita sala, maibé nia mak lakohi ne’e laiha problema. Entaun fó uluk ba sira ne’ebé hakarak no sira ne’ebé hanoin lai ou duvidozu tanba sira sei mai no hakarak fali. Uluk estratejia ami uza ba ukun-an hanesan ne’e,” PM akresenta.

PM dehan, Governu hakarak fó vasina ba ema hotu maibé sé mak lakohi, Governu sei la bá monu ain atu husu hakarak vasina.

“Governu ida ha’u lidera sei la bá hakneak iha populasaun nia ain hodi husu favór vasina,” nia afirma.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here