Diretór East Timor Development Agency (ETDA), Januario Neto Mok.

DILI, 17 juñu 2021 (TATOLI)—Diretór East Timor Devolopment Agency (ETDA), Januario Neto Mok hateten, kinta ne’e ETDA hahú reativa formasaun hodi fó formasaun ba juventude na’in-80 hosi Hera-Metinaro ne’ebé fasilita hosi Programa Nasaun Unida ba Dezenvolvimentu (PNUD).

Notísia Relefante: PNUD fasilita juventude 80 hosi Hera-Metinaro tuir formasaun iha ETDA

Formasaun ne’e hahú fali tanba bazea ba desizaun liuhosi reuniaun Konsellu Ministru iha kuarta (16/06) ne’e deside, hakotu konfinamentu domisiliáriu jerál iha munisípiu Díli maibé renova hikas Serka Sanitária.

“Ami hahú ona formasaun ohin. Agora ami iha Metinaro hodi halo kontinuasaun formasaun ba juventude sira hosi Metinaro kona-ba ai-parapa. Ne’ebé, ohin, ami mai iha ne’e, sira la preparadu. Entaun, ami fila-fali ba Díli no aban sira hotu mai tuir fali kursu iha Díli hodi aula hanesan baibain. Reativa programa no kontinua halo formasaun ba juventude na’in-80 hosi Hera no Metinaro, atu sira-nia formasaun ne’e ramata tiha,” Januario Neto Mok hateten ba Agência Tatoli, liuhosi WhatsApp, kinta.

Aban, nia dehan, funsionáriu ETDA sei tama fila-fali servisu hodi halo limpeza jerál ba preparasaun graduasaun ba juventude na’in-80 ne’e, no ba formandu regulár sira foun no tuan, iha loron 22 fulan-juñu ne’e, sira hotu-hotu kontinua fali tuir formasaun.

Entretantu, Diretór Sentru Nasionál Formasaun Profissionál-Becora (CNFP-Becora), Lourenço da Silva Gusmão hateten, sentru formasaun Becora seidauk bele reativa formasaun ba formandu sira tanbá Ministériu Edukasaun Juventude no Desportu (MEJD) seidauk reativa prosesu ensinu aprendizagen.

“Ami seida’uk bele hahú formasaun ne’e, tanbá iha parte eskola sira seida’uk reativa prosesu aprendizagen. Bainhira eskola sira reativa hotu fali ona, entaun ita-nia mós bele la’o fila-fali, tanbá dehan labele halibur ema barak,” Lourenço da Silva Gusmão hateten.

Bainhira formasaun ne’e reativa hikas, parte Sentru Nasionál Formasaun Profissionál Becora sei fó sai avizu ba formandu sira, atu sira bele mai tuir fali formasaun hanesan baibain.

Notísia Relefante: Governu hakotu konfinamentu domisiliáriu no autoriza hikas movimentu transporte públiku

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here