Formandu sira-ne’ebé tuir formasaun iha ETDA iha área Turizmu no Otelária. Imajen/Espesiál.

DILI, 08 juñu 2021 (TATOLI)—Programa Nasaun Unida ba Dezenvolvimentu (PNUD) ka United Nations Development Programme (UNDP) fasilita formasaum ba juventude hamutuk na’in-80 hosi Hera no Metinaro hodi tuir formasaun iha Sentru Formasun East Timor Development Agency (ETDA).

Diretór East Timor Development Agency (ETDA), Januario Neto Mok, informa durante iha pandemia COVID-19 ne’e PNUD fasilita juventude kuaze na’in-160-resin hodi tuir formasaun iha ETDA maibé ETDA kosentra de’it hodi fó formasaun ba juventude na’in-80 hosi Hera no Metinaro.

Notísia Relevante: Governu Nova Zelándia apoia rihun $16 ba Sentru Formasaun ETDA

“Durante pandemia COVID19, atividade sira-ne’ebé ETDA konsentra mak fó formasaun ba juventude sira hosi Hera no Metinaro ne’ebé UNDP fasilita. Hafoin tama situasaun serka sanitária, atividade formasaun ne’e paradu to’o ohin loron,” Januario Mok hateten ba Agência Tatoli, iha nia knaar fatin, tersa ne’e.

Juventude sira hosi Hera no Metinaru ne’e, tuir formasaun iha área Turizmu, Ospitalidade, Asesorias de Moda Joias, hanesan oinsá mak halo arte zenatu hosi produtu lokál sira.

Formasaun ne’e hahú iha fulan-marsu 2021 no konsege la’o duni to’o semana rua nia laran, maibé tanba serka sanitaria no konfinamentu domisiliáriu entaun halo atividade ne’e paradu to’o ohin loron.

“Agora ami he’in hela kuandu serka sanitaria ne’e ramata mak juventude hirak ne’e tenke kontinua fali tuir formasaun refere, tanba ETDA iha kondisaun di’ak no la’o tuir hela medida prevensaun hosi protokolu minsitériu saúde no Organizasaun Mundiál Saúde,” nia dehan.

Programa Nasaun Unida ba Dezenvolvimentu (PNUD) nia programa ne’e atu suporta NGO lokál no fasilita juventude sira tuir formasaun iha ETDA, atu dezenvolve sítiu turístika lokál sira iha Hera no Metinaro no fatin seluk.

“Hafoin tuir kursu, joven sira bele dezenvolve sítiu turístika sira hanesan mangrove no jardin sira iha Hera. Iha ne’e, ami (ETDA) konsentra iha dezenvolvimentu rekursu umanu ba joven sira. Bainhira PNUD kuandu mai ko’alia ho ami, ami halo programa hosi orientasaun xefe suku no xefe aldeia sira. Tanbá turizmu ne’e ema hotu iha ne’ebá tenke sai-na’in, atu ita hotu bele garante sustentabilidade no sira tenke haree benefísiu ba iha ne’ebá,” Januario Neto Mok dehan.

Nia hateten, bainhira serka sanitaria ne’e ramata, sira-nia parte sei fasilita mós formasaun ba juventude sira hosi Rejiaun Administrativa Espesiál Oé-Cusse Ambeno (RAEOA) ne’ebé sei partisipa hosi juventude hamutuk na’in-110 hosi Oé-Cusse.

Juventude hirak ne’e, sei tuir formasaun iha área turizmu, turístika, marketing, no halo mós hanesan arte zenatu ba juventude sira liuhosi mobile training.

“Ami sei halo iha fulan-jullu no agostu. Entaun, aminia programa ida mak ne’e, depois konfinamentu ramata, ami sei halo programa ne’e ba fali iha OéCusse. Tanba ami mós la’ós konsentra iha Díli de’it no ami laiha bens iha fatinfatin, maibé ami bele halo hanesan mobile training iha fatin seluk,” nia dehan.

Jornalista: Nelia Fernandes

Editór: Cancio Ximenes    

HAKEREK NO HATÁN

Please enter your comment!
Please enter your name here