Antoni-oan sira prepara atu sa'e Ró SUCCES fila ba Rejiaun Administrativa Espesiál Oé-Cusse Ambeno (RAEOA), segunda (31/05/2021). Imajen Tatoli/Arminda Fonseca

OÉ-CUSSE, 17 JUNU 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM-TL), Arsénio Paixão Bano, hateten autoridade RAEOA prepara ona kuerentena atu simu Atoni-oan sira-ne’ebé iha semana ne’e halo viajen hosi Dili mai Oé-Cusse.

Nu’udar Prezidente Autoridade, nia parte prepara antes ona fatin no horisehik halo ona fiskalizasaun ba kuerentena lima (5) atu haree ninia progresu preparasaun ne’e to’o iha ne’ebé.

Notísia Relevante: Autoridade RAEOA fasilita tan Atoni-oan 115 fila ba Oé-Cusse

“Ita-nia obra sira kona-ba kuarentena prepara fatin lima (5) hotu tiha ona. Kuarentena Sakato, Dormitóriu Alfandega Mahata, Otél Oé-Upun uza ona. Kuerentena Kiu-Maonteko finaliza ona maibé ita prepara ba izolamentu no prepara ba futuru sentru saúde zona Pante Makasar, zona sentrál ninian Eskóla Tekniku Agrikultura Rejiaun Oé-Cusse (ETARO) hotu tiha ona. Tanba ne’e mak semana ne’e ita sei simu tan ema mai hosi Dili,” Arsenio Paixão Bano informa ba Ajênsia TATOLI iha nia servisu fatin, Oébau, kinta ne’e.

Kuarentena seluk hanesan iha portu kitahara Mahata fulan ida-ne’e parese finaliza ona, kuerentena iha sub-rejiaun Oésilo semana kotuk kompaña entrega ona ba autoridade. Kuerentena iha sub-rejiaun Pasabé, semana ida-ne’e entrega ona no kuarentena sub-rejiaun Nitibe semana (2) tan empreza entrega ona ba autoridade RAEOA.

 Notísia Relevante: Ekipa RAEOA-CIGC sei koordena transporta Atoni-oan fazeadamente bá Oé-cusse

“Se COVID-19 laiha no laiha ona kuerentena, ita prepara ba oin ne’e, kuarentena iha sub-rejionál sira ne’e sei uza fali ba sentru saúde ba inan isin-rua sira bainhira atu partus. Tanba, ita harii ona uma 11 ho rezidénsia ba pesoál saúde sira, se bainhira COVID-19 laiha ona. Se COVID-19 iha nafatin, ita iha ona fatin atu serví pasiente sira,” nia hateten.

Autoridade RAEOA simu ona informasaun katak kuarentena sira iha ne’e, prontu ona atu simu tan Atoni-oan sira-ne’ebé fila hosi Dili.

Entretantu kona-bá dadus Atoni-oan atu viajen hosi Dili mai Oé-Cusse, Ofisiál Komunikasaun Internál no Eksternál COVID-19 RAEOA, Marcos Seo, informa ekipa Komisaun Prevensaun no Mitigasaun COVID-19 RAEOA sei hein dadus hosi Dili maibé kona-bá fatin kuerentena autoridade prepara ona.

Tuir nia, dadaun ne’e ekipa ida iha Dili kontinua atende Atoni-oan sira liu-liu estudante no populasaun sira atu fila-fali mai iha Oé-Cusse. Nia husu, atu ema hotu-hotu kumpre nafatin medida prevensaun COVID-19 hosi Minsitériu Saúde no Organizasaun Saúde Mundial (OMS) hodi uza máskara, fase liman ho sabaun no distansiamentu sosiál.

Notísia Relevante: Autoridade RAEOA konstrui kuarentena haat iha fronteira

Jornalista: Abilio Elo Nini

Editór: Cancio Ximenes

HAKEREK NO HATÁN

Please enter your comment!
Please enter your name here