Prezidente RAEOA-ZEESM,TL, Arsénio Paixão Bano. Imajen TATOLI/Egas Cristóvão

DILI, 24 maiu 2021 (TATOLI)–Prezidente Autoridade (PA) Rejiaun Administrativu Rejiaun Espesiál Oé-cusse Ambeno (RAEOA) no Zona Espesiál Ekonomia Sosiál Merkadu, Timor-Leste (ZEEMS, TL), Arsénio Paixão Bano, hateten, ekipa sei halo koodernasaun ho Sala Situasaun-Sentru Integradu Jestaun Krize (SS-CIGC, sigla portugés) hodi transporta fazeadamente Atoni-oan sira ba Oé-cusse, ne’ebé durante semana ida ona okupa edifísiu sentrál.

“Ohin, loloos ekipa bá ona iha Dili, maibé foin simu karta autorizasaun viajen hosi CIGC. Tanba ne’e aban (25/05) ekipa ne’ebé kompostu hosi ema na’in-tolu (Doutór ida, Enfremeira ida no hosi Gabinete PA ida) bá ho aviaun atu halo koodernasaun ho Governu sentrál liuhosi Sala Situasaun, atu transporta fazeadamente ami-nia ema iha Dili mai Oé-cusse,” Prezidente Autoridade RAEOA, infroma ba Agência TATOLI, via telefónika, segunda ne’e.

Nune’e, Prezidente Autoridade husu ba Atoni-oan sira atu mantein kalma hodi kontribui ba prosesu transportasaun, tanba presiza teste swab ho rezultadu negativu COVID-19 no autorizasaun viajen.

“Ami hateten ona ba ita-nia alin sira iha ne’ebá, katak kapasidade kuaretena limitadu tebes, ne’ebé semana oin sei transporta ema 80 mai Oé-cusse ho fazeadamente to’o ramata,” nia akresenta.

Ba kestaun ne’e, ekipa sira sei buka ró atu transporta pasajeiru sira ba Oé-cusse.

 “Ekipa halo koordenasaun atu hetan ró hodi transporta komunidade sira ne’ebé prontu ona atu mai, tanba atu mai Oé-cusse tenke iha rezultadu swab no hetan karta autorizasaun hosi CIGC inklui ró ne’e mós tenke hetan. Sira sei mai ho ró, maibé bainhira hakarak mai ho aviaun sira mak tenke selu rasik,” nia hatutan.

Nia husu Atoni-oan sira atu kolabora ho ekipa sira hodi tuir rezekitu sira hanesan asina deklarasaun atu mai iha Oé-cusse, tenke kumpre kuarentena, no rekezitu atu hosi CIGC.

Autoridade garante katak populasaun 85.000 iha Oé-cusse labele rejista  transmisaun lokál no komunitária no daudaun ne’e atividade la’o normál hanesan eskola, atividade ekonómia, tanba ne’e presiza kumpre rekezitu molok atu tama rejiaun ne’e.

“Ami-nia hakarak populasaun labele kontájia ho COVID-19, ne’ebé hakarak fila di’ak maibé mai tenke hela iha kauaretena,” nia fó hanoin.

Iha sorin seluk, Portavóz Atoni-oan, Zecafriado Afulit Coa, hateten, Atoni-oan hamutuk 856, kompostu hosi estudante, komunidade sira ne’ebé mak mai buka moris, fa’an ai-han no serbisu  seluk hanesan taxista sira hakarak fila ba Oé-cusse tanba iha Dili hasoru situasaun defisíl.

“Razaun fundamentál maka ami hakarak kore-an hosi situasaun defísil ne’e rasik, tanba daudaun ne ami laiha ona osan atu selu hela fatin no ai-han atu nesesita moris loron-loron,” nia akresenta.

Nune’e, nia dehan, prontu koopera ho ekipa atubele transporta sira bá Oé-cusse.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here