Prezidenti Autoridade Munisípiu Baucau (PAM), Olívio 'Bou Lesa' Freitas. Imajen TATOLI/Natalino Belo

BAUCAU, 16 juñu 2021 (TATOLI)—Prezidente Autoridade Baucau (PAM), Olívio ‘Bou Lesa’ Freitas, enkoraja autoridade lokál sira aproveita Programa Nasionál ba Dezenvolvementu Suku (PNDS) no Programa Dezenvolvementu Intergradu Munisipál (PDIM) atu rekupera ekonomia ho maneira envolve komunidade iha atividade.

Daudaun ne’e liuhosi PDIM prevee $100.000 ba postu administrativu Baguia, Baucau Villa, Laga, Vemasse, Venilale no Quelicai, iha munisípiu Baucau no PNDS liuhosi fundu Reziliensia Komunitária no Rekupesaun Ekonómika (RKRE) prevee $966.360 ba postu Laga, Quelicai no Baucau Villa, ne’ebé halo ona akordu ho autoridade munisipál atu hamutuk ho xefe suku idaidak iha postu implementa programa.

Notísia relevante: PNDS kontinua implementa programa regulár iha Baucau

“Ho osan ne’ebé aloka ona, agora postu administrativu idaidak gasta iha ne’ebá, ne’e munisípiu halo akordu ho postu admistrativu idaidak no sira mak iha kompeténsia atu jere osan iha postu admistrativu ho sira-nia xefe suku sira, signifika atu rekupera mós ekonomia iha ne’ebá,” PAM Baucau informa iha Sentru Konvensaun Baucau (CCB, sigla Portugés), kuarta ne’e.

Tuir PAM, osan ne’ebé tama ba konta autoridade postu administrativu neen hosi fundu PDIM hanesan fundu operasionál ne’ebé hlo ona akordu ho autoridade munisípiu ho postu atu ezekuta iha postu ne’ebé envolve suku idaidak.

Enkuantu, fundu RKRE hosi PNDS ne’ebé finansia hosi Governu Austrália, diretamente transfere ba konta suku hodi implementa programa infraestrutura báziku hanesan estrada, bee-mos, elktrisidade, reabilitasaun eskola, hadi’a irrigasaun tuir dezeñu programa hosi suku idaidak.

Notísia relevante: Austrália apoia millaun $15,5 ba Timor-Leste implementa programa rua

“Osan ne’e sei ba ema sira ne’ebé kaer serbisu, signifika katak aumentu ekonomia sosiedade tomak iha suku idaidak no mós postu admistrativu,” nia akresenta.

Objetivu hosi implentasaun programa sira ne’e hotu atu halo dezenvolvementu iha nível suku ne’ebé agora ba faze kontinuasaun no ho implementasaun RKRE iha suku, ne’ebé bele kontribui ba ekonomia Komunidade.

Kona-ba implentasaun, xefe suku hosi kada postu admistrativu sira mak sei aprezenta programa prioridade iha suku idaidak, hafoin hamutuk ho PNDS implementa iha suku no aldeia.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here