Diretora PNDS munisípiu Baucau, Amélia Maria Viegas. Imajen TATOLI/Natalino Belo

BAUCAU, 15 juñu 2021 (TATOLI)–Diretora Programa Nasionál Dezenvolvementu Suku (PNDS) munisípiu Baucau, Amélia Maria Viegas, hateten, daudaun ne’e kontinua implementa programa regulár iha suku 59.

“Suku 59 hotu implementa PNDS faze regulár ho normál, hafoin ita tama ho Uma Kbiit Laek ba suku 59 no iha mós projetu reabilitasaun sede suku, ne’ebé agora sei hala’o iha faze dahuluk iha postu Quelicai no Laga no faze daruak iha postu Baucau villa. Ita planeia faze datoluk sei tama iha orsamentu tinan 2022 nian,” Diretora PNDS munisipál informa iha ninia knaar fatin, Admistrasaun munisípiu Baucau, Villa nova, tersa ne’e.

PNDS faze regulár ne’ebé implementa iha Baucau, ho kustu mai hosi Orsamentu Jerál Estadu (OJE) kada tinan, ne’ebé mak kada suku sei hetan osan ba programa prioridade.

Programa sei mai hosi aldeia, hato’o ba suku hodi deside nia prioridade, enkuantu PNDS nafatin la’o tuir nia papél hodi fasilita orsamentu bazeia ba sensus 2015 kada suku.

“Orsamentu ne’e fixu ona iha verba fundu infraestrutura, tamba ne’e agora PNDS Baucau la’o hela iha faze dahuluk siklu tolu, faze rua siklu tolu no faze tolu siklu tolu,” nia akresenta.

PNDS Baucau mós nafatin hala’o sosializasaun programa ba siklu dahaat, ne’ebé hetan apoiu orsamentu hosi Governu Austrália hodi implementa programa Reziliénsia Komunidade no Rekuperasaun Ekonómiku, ne’ebé  daudaun hahú implementa liuhosi sosializasaun ba faze dahuluk siklu dahaat iha postu Quelicai, Laga no Baucau Villa.

Notísia relevante: Austrália apoia millaun $15,5 ba Timor-Leste implementa programa rua

Programa sira ne’ebé PNDS Baucau rasik implementa, kompostu hosi programa regulár, Reziliénsia Komunitária no Rekuperasaun Ekonómika (RKRE), Uma Kbiit Laek, inklui konstrui eskola rua, ne’ebé to’o agora obra ne’e atinje ona 99% iha suku Maluru postu Quelicai no suku Atelari postu Laga.

Hosi programa sira ne’e, PNDS Baucau mos konstrui ona fatin halimar ba Labarik (jardín infantil) unidade rua hanesan iha suku Uatuhako, postu Venilale no iha suku Lalisura postu Baguia.

“Programa PNDS regulár barak liu orienta ba bee-mos tamba komunidade mai ho nia prioridade rasik, balun ba estrada no irrigasaun, maibé nafatin bazeia ba menu indikativu PNDS maibé prioridade mai hosi suku,” nia hatutan.

Bazeia ba livrus 3-B Orsamentu Munisípiu tinan 2021 nian, totál orsamentu ba PNDS Baucau hamutuk millaun $4,6, kompostu hosi programa regulár hamutuk millaun $1,3, ne’ebé sei finansia ba aktividade fízika millaun $1,1 ba suku 25 no $152.750 ba kustu operasionál.

Enkuantu, programa Uma Kbiit Laek rasik hamutuk millaun $3,2, kompostu hosi kustu atividade millaun $3 ba suku 59, aldeia 177, kustu operasionál hamutuk $117.000 no fee ba Banku Nasionál Komérsiu Timor-Leste (BNCTL, sigla portugés) hamutuk $6.372.

Fundu PNDS ba reabilitasaun hamutuk $155.216, finansia kustu atividade fízika $137.970 no kustu operasionál hamutuk $17.970.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here