Ministru Finansa, Rui Augostu Gomes, no Embaixadora Interina Austrália, Philippa Venning, asina akordu kontribuisaun finanseira, iha salaun auditóriu Ministériu Finansa, sesta (04/06). Imajen TATOLI/Francisco Sony

DILI, 04 juñu 2021 (TATOLI)—Governu Timor-Leste, reprezenta hosi Ministru Finansa, Rui Augusto Gomes, no Governu Austrália reprezenta hosi Charge d’Affaires hosi Embaixada Austrália, Philippa Venning, selebra akordu kontribuisaun finanseira direta ho montante millaun $15,5, atu apoia programa reziliénsia komunitária no rekuperasaun ekonómika.

“Kontribuisaun finanseira ne’e aloka diretamente ba komunidade atu kontinua projetu infraestrutura bázika, ne’ebé sei kria kampu traballu, oportunidade hetan rendimentu no hadi’a di’ak liután prestasaun serbisu ba família sira hotu, ne’ebé komponente rekuperasaun hirak ne’e aliña ho planu rekuperasaun ekonómika,” Ministru Rui Augusto Gomes, hateten liuhosi diskursu iha ámbitu seremónia asina akordu iha salaun auditóriu Ministériu Finansa, Aitarak-laran, sesta ne’e.

Orsamentu ne’e sei ezekuta durante tinan-rua, hahú hosi 01 jullu tinan-2021 to’o 30 juñi 2023.

Notísia relevante: Timor-Leste no Austrália sei selebra akordu kontribuisaun finanseira reziliénsia komunitária

Kontribuisaun finanseira ne’e sei aloka no integra diretamentu ba sistema orsamentu Governu.

Ministru Finansa, Rui Augostu Gomes. Imajen TATOLI/Francisco Sony

“Kontribuisaun ne’e hatudu Governu Austrália nia konfiansa ba sistema ne’ebé Governu Timor-Leste kria ona, ne’ebé parte rua komprometidu atu serbisu hamutuk hodi hadi’a liután,” Ministru akresenta.

Biban ne’e, governante ne’e bolu atensaun ba liña ministériu tomak no ajénsia implementadór sira hotu atu mellora prestasaun serbisu iha nível baze atu garantia katak asisténsia hirak ne’e sei lori impaktu signifikativu no mudansa pozitivu ba timor-oan sira-nia moris.

“Hodi naran Governu Timor-Leste, ha’u hato’o apresiasaun ba Governu Austrália no povu australianu sira, ba apoiu sira ne’e. Onra ida ba ami hodi bolu ita-boot sira hanesan parseiru dezenvolvimentu, viziñu no ami-nia belun di’ak,” Ministru hatutan.

Iha biban hanesan, Charge d’Affaires hosi Embaixada Austrália, Philippa Venning, apresia tanba bele apoia Governu no povu Timor-Leste, ba programa rua ne’ebé diretamente destina no benefisia komunidade iha Timor-Leste atu rekupera hosi impaktu COVID-19 ba rekuperasaun ekonómika.

“Australia kontente bele fornese pakote ida-ne’e liuhosi programa rua Governu ne’ebé efetivu tebes, hanesan Programa Nasionál Dezenvolvimentu Suku (PNDS) no Bolsa da Mãe Jerasaun Foun, hamutuk ho Ministériu Finansa, Ministériu Negósiu Estranjeiru no Kooperasaun, Ministeriu Administrasaun Estatál no Ministériu Solidaridade Sosiál no Inkluzaun”, Philippa Venning subliña.

Ministru Finansa, Rui Augostu Gomes, no Embaixadora Interina Austrália, Philippa Venning, asina akordu kontribuisaun finanseira, iha salaun auditóriu Ministériu Finansa, sesta (04/06). Imajen TATOLI/Francisco Sony

Kontribuisaun finanseira ne’e hodi hadi’a infraestrutura bázika hanesan estrada, moru, drenajen, bee moos, irigasaun no klínika iha suku 200 resin, liuhosi programa PNDS, ho totál orsamentu millaun $10,5.

Enkuantu, millaun $5 sei aloka ba programa Bolsa da Mãe Jerasaun Foun, ne’ebé hanesan programa asisténsia sosiál foun ida ba inan isin-rua no labarik idade kiik, ne’ebé programa pilotu sei lansa iha munisípiu Ainaro, Bobonaro no Rejiaun Administrativa Espesiál Oé-cusse Ambeno (RAEOA) ho benefisiáriu hamutuk ema 40.000 resin.

Programa ne’e nia objetivu mak atu redús má-nutrisaun no pobreza iha Timor-Leste, ho nia alvu mak inan isin-rua inklui bebé idade zero to’o tinan rua.

Programa ne’e aprezenta husi Ministériu Solidaridade Sosiál no Inkluzaun (MSSI) no hetan aprovasaun hosi Konsellu Ministru iha-fevereiru 2021.

Programa PNDS no Bolsa da Mãe Jerasaun Foun sei implementa iha kontestu reziliénsia komunitária no rekuperasaun ekonómiku iha Timor-Leste durante pandemia globál COVID-19.

Seremónia ne’e, partisipa mós hosi Ministra Negósiu Estranjeiru, no Kooperasaun, Adaljiza Magno, Ministru Administrasaun Estatál, Miguel Pereira de Carvalho no Vise-Ministra Solidaridade Sosiál no Inkluzaun, Signi Chandrawati Verdial inklui entidade relevante.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here