Ministru Koordenadór Asuntu Ekonómiku, Joaquim Amaral. Imajen TATOLI/ Francisco Sony

DILI, 16  juñu 2021 (TATOLI)--Governu Timor-Leste hamutuk ho empreza  australianu, hahú diskute transformasaun estatutu TL-Cement atu fó biban ba Estadu Timor-Leste sai asionista no tau asaun ba projetu instalasaun fábrika sementu iha Munisípiu Baucau.

Ministru Koordenadór Asuntu Ekonómiku (MKAE), Joaquim Amaral, hateten Governu hein kompañia kompleta dokumentu atu membru Konsellu Administrasaun sira bele tuur  hamutuk ona halo transformasaun.

“Bainhira kompleta, membru Konsellu Administrasaun tuur hamutuk hodi halo reuniaun dahuluk halo transformasaun hosi TL-Cement limitada ba Sosiedade Anónima (S.A) hodi tama ba faze instalasaun fábrika sementu iha tinan ne’e,” Ministru Joaquim, hateten iha resintu Ministériu Finansa, Aitarak-laran, kuarta ne’e.

Notísia relevante: Governu nomea reprezentante rua ba Konsellu Administrasaun TL-Cement

Governu nomea Ministru Joaquim no Ministru Finansa, Rui Augusto Gomes, reprezentante Estadu sai Konsellu Administrasaun TL-Cement, atu hamutuk ho empreza australianu ne’e halo planu no dezisaun estratéjiku tanba sai ona empreza konsórsiu.

Daudaun ne’e, parte rua prepara no esforsu-an atu kompleta serbisu administrasaun sira atubele hahú projetu.

“Ami tau atensaun tebes atu aselera no kompleta rekezitu sira, tanba ita-nia alvu tinan ne’e mak halo lansamentu fatuk dahuluk fábrika sementu ne’e,” nia akresenta.

Governu fó sinál konfiasan ba TL-Cement liuhosi aprova ona provizasaun partisipasaun fundu Estadu Timor-Leste ho montante millaun $50.

Notísia relevante: MKAE propoin mantein provizaun partisipasaun millaun $50 iha TL-Cement

Tuir planu, TL-Cement sei harii fábrika sementu iha zona luan nakonu ho ahu-ruin (kakláriu) ho kualidade a’as iha rejiaun Baucau no sei halo produsaun sementu iha faze bázika fábrika hodi halo esportasaun no sementu ba abastesimentu konstrusaun sivíl iha Timor-Leste.

Komunidade lokál mak sei sai benefisiáriu dahuluk ba projetu tanba sei abraje objetivu boot tolu hodi reforma ekonómika, hanesan aumenta investimentu privadu, promove diversifikasaun ekonómika no promove empregu sustentável.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here