Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (05/05). Imajen TATOLI/Egas Cristóvão

DILI, 05 maiu 2021 (TATOLI)–Ministru Koordenadór Asuntu Ekonómiku, Joaquim Amaral aprezenta proposta iha reuniaun Konsellu Ministru (KM) hodi mantein provizaun partisipasaun Timor-Leste ba investimentu TL-Cement ho montante millaun $50.

“Liuhusi proposta Ministru Koordenadór Asuntu Ekonómiku, Konsellu Ministru delibera ona hodi mantein provizaun millaun $50 ne’ebé destina ba partisipasaun Estadu iha ámbitu akordu espesiál investimentu ne’ebé selebra ho TL-Cement, Lda, hosi prazu adisionál fulan sia, to’o loron 31 dezembru 2021,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha auditoriu Ministériu Finansa, Aitarak-laran, kuarta ne’e.

Tuir governnate ne’e, aprovasaun ne’e hatudu partisipasaun Timor-Leste nian iha TL-Cement, ne’ebé oras ne’e iha hela bank mantein nafatin to’o empreza ne’e finaliza ninia preparativu no hahú serbisu.

Tuir akordu, TL-Cement sei harii fábrika simentu besik zona luan ne’ebé nakonu ho ahu-ruin (kalkáriu) ho kualidade a’as iha rejiaun Baucau no sei halo produsaun simenetu iha faze bázika fábrika hodi halo esportasaun no simentu ba abastesimentu konstrusaun sivíl iha Timor-Leste.

Komunidade lokál sei sai benefisiáriu dahuluk ba projetu ne’e, tanba sei abranje objetivu boot tolu kona-ba reforma eknómika hanesan aumenta investimentu privadu, promove diversifikasaun ekonómika no promove empregu sustentavél.

Iha 17 maiu 2016, Governu Timor-Leste no TL-Cement asina akordu espesiál investimentu ba projetu no iha tinan 2018, Governu liuhosi reniaun KM estraordinária aprova rezolusaun ba akordu espesiál ida ho empreza TL-Cement hodi aselera progresu implementasaun fábrika simentu iha munisípiu Baucau hodi loke kampu serbisu ba joven sira purvolta 300 iha faze dahuluk, hafoin kontinua to’o 1.000-resin.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here