Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 27 abríl 2021 (TATOLI)Governu nomea ona reprezentante Estadu Timor-Leste na’in-rua atu sai membru Konselu Administrasaun iha empreza TL-Cement hodi kontinua instalasaun fábrika simentu iha munsípiu Baucau.

“Ita-nia Governu halo ona nomeasaun ba reprezentante rua atu reprezenta iha Konsellu Administrasaun empreza no empreza mós nomea ona ema na’in-ida atu kontinua fábrika simentu,” Ministru Petóleu no Minerál, Víctor da Conceição Soares, hateten ba Agência TATOLI, iha Parlamentu Nasionál (PN), tersa ne’e.

Reprezentante Estadu hanesan Konsellu Administrasaun TL-Cement maka Ministru Koordenadór Asuntu Ekonómiku, Joaquim Amarál hamutuk ho Ministru Finansa, Rui Augusto Gomes.

Enkuntu, hosi parte TL- Cement nomea ona ninia reprezentante ida iha Konsellu Administrasaun hodi halo planu no dezisaun estratéjiku tanba sai ona empreza konsórsiu, nune’e bele aumenta kapitál ba investimentu ne’e.

Nune’e, Governante ne’e dehan, dadaun TL-Cement prepara ona auditoria bankária ida ba gastu orsamentu ne’ebé uluk Governu fó ba sira hamutuk millaun $4,9 atubele atualiza atividade peskiza no estudu esplorasaun.

“Empreza ne’e tenke halo lai audotoria bankária mai, hafoin ita haruka ba Tribunál Konta hodi avalia bainhira ona, hafoin ita halo ona investimentu. Hau hetan relatóriu hosi TL-Cement rasik mai relata sira-nia programa foun no buat hotu la’o di’ak no ha’u hanoin tinan ne’e (2021) sei aselera liután,” Nia garante.

Nia konsidera progresu instalasaun fábrika simentu iha munisípiu Baucau la’o di’ak tanba Prezidente TL-Cement, Jamees Rhee mós hatudu kompromisu atu kontinua projetu simentu iha Baucau.

“Progresu la’o di’ak tebes tanba reprezenta emEstadu mós ita hili ona no asina hotu ona ne’ebé garantidu buat hotu la’o di’ak ho susesu,” nia afirma.

Tuir planu, TL-Cement sei harii fábrika simentu besik zona luan ne’ebé nakonu ho ahu-ruin (kalkáriu) ho kualidade a’as iha rejiaun Baucau no sei halo produsaun simenetu iha faze bázika fábrika hodi halo esportasaun no simentu ba abastesimentu konstrusaun sivíl iha Timor-Leste.

Komunidade lokál maka sei sai benefisiáriu dahuluk ba projetu ne’e, tanba sei abranje objetivu boot tolu kona-ba reforma eknómika hanesan aumenta investimentu privadu, promove diversifikasaun ekonómika no promove empregu sustentavél.

Iha 17 maiu 2016, Governu Timor-Leste no TL-Cement asina akordu espesiál investimentu ba projetu.

Iha tinan 2018, Governu liuhosi reniaun Konsellu Ministru estraordináriu aprova rezolusaun ba akordu espesiál ida ho empreza TL-Cement hodi aselera progresu implementasaun fábrika simentu iha munisípiu Baucau hodi loke kampu serbisu ba joven sira purvolta 300 iha faze dahuluk, hafoin kontinua to’o 1.000-resin.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here