Ministru Prezidénsia Konsellu Ministru no Portavóz Governu, Fidelis Manuel Leite Magalhães. Imajen TATOLI/Francisco Sony

DILI, 16 juñu 2021 (TATOLI)–Governu liuhosi reuniaun Konsellu Ministru (KM) iha kuarta ne’e, define ona montante selu kompensasaun ba utilizasaun terrenu, iha implementasaun projetu Sidade Universitária iha munisípiu Aileu.  

Desizaun ne’e liuhosi Projetu Rezolusaun Governu, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos, no hetan ona aprovasaun.

Notísia relevante: Konsultór Bernabad Arquitectura Aprezenta Relatóriu Prelimináriu Sidade Universitáriu Aileu

“Rezolusaun Governu ne’e define pagamentu másimu ba metru kuadradu ida ho valór $3, nune’e halo kompensasaun ba família sira ne’ebé identifika hanesan titulár hosi podér pose terrenu sira ne’ebé abranje área implementasaun projetu,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha salaun auditóriu Ministériu Finansa, Aitarak-laran.

Nune’e, define montante másimu hodi selu infraestrutura no kultura agríkola sira ne’ebé afetadu ba projetu.

Notísia relevante: Sidade universitáriu Aileu, millaun $2.1 ba indemnizasaun ho reklamasaun

Enkuantu, indemnizasaun no reklamasaun komunidade afetadu, Governu prevee ona orsamentu ho montante millaun $2,1.

Tuir levantamentu dadus iha área implementasaun projetu, uma-kain 44 sei lakon uma, abitante 58 sei lakon ai-horis no abitante 102 sei lakon rai.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here