MOP-MESSK akompaña aprezentasaun relatóriu prelimináriu konsultór internasionál ba Sidade Universitáriu Aileu, iha edifísiu MOP, Caicoli, kinta (09/07). Imajen/Mídia-MOP

DILI, 09 jullu 2020 (TATOLI) – Ekipa tékniku kompostu husi asesór no tékniku Abitasaun no Planeamentu Urbanu Gabinete Ministériu Obra Públika (MOP) partisipa iha aprezentasaun relatóriu prelimináriu husi Konsultór internasionál Barnabad Arquitectura SLP ba Sidade Universitáriu Aileu.

“Enkontru ne’e ho objetivu atu rona aprezentasaun husi konsultór kona-ba Sidade Universitáriu Aileu no rona rekomendasaun sira husi project stering committee ne’ebé kompostu husi ekipa MOP no Ministériu Ensinu Superiór Siénsia no Kultura (MESSK),” refere nota imprensa ne’ebé Agência Tatoli asesu,kinta ne’e.

Antes ne’e, Diretór Nasionál Aprovizionamentu MOP, Quintiliano Afonso Belo, informa kompañia hamutuk 40-resin hahú tuir ona konkursu públiku atu halo estudu viabilidade no Detailed Engineering Design (DED) ba Sidade Universitária Aileu.

MOP rasik prevee ona orsamentu ba estudu viabilidade no DED hamutuk $550.000.

Kompañia ne’ebé manán konkursu bele hala’o estudu viabilidade no dezeñu ho kualidade no padraun internasionál hodi ajuda Governu atu hala’o konstrusaun.

Tuir rekezitu, kompañia tenke iha kapasidade atu halo estudu viabilidade ba impaktu jeotékniku, ambientál, sósiu-ekonómiku, liuliu analiza ba fakuldade saida de’it mak atu loke ka muda ba iha Aileu durante fulan-tolu ka fulan-neen.

VIII Governu Konstitusionál mak loke konkursu públiku ba kompañia sira atu hala’o estudu viabilidade no hala’o dezeñu detailladu molok Governu prevee osan ba konstrusaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here