Esbosu estudu viabilidade Sidade Universitária Aileu. Imajen/MOP

DILI, 16 juñu 2021 (TATOLI) – Governu prevee ka tau ona orsamentu ho montante millaun $2.1 ba nesesidade indemnizasaun ho reklamasaun ba komunidade afetadu hosi konstrusaun sidade universitáriu Aileu.

Notísia Relevante : Projetu sidade universitáriu iha Aileu, prevee millaun $1.037,987 ba indemnizasaun

Ministru Ensinu Superiór, Siénsia no Kultura (MESSK), Longuinhos dos Santos, hateten, planu kompensasaun ba komunidade sira iha orsamentu millaun $2.1, maibé kalkulasaun provizóriu atu selu indemnizasaun purvolta millaun $1.3. Restu hosi montante orsamentu millaun $2.1, purvolta $642.000, sei prepara atu selu reklamasaun hosi komunidade.

Ministru Longuinhos dos Santos, hateten kompensasaun ne’ebé Governu sei atribui iha tempu badak tuir klasifikasaun no kategoria  tolu, maka hanesan indemnizasaun ba komunidade nia uma, komunidade nia rai no komunidade nia ai-horis ka plantasaun.

“Konsellu Ministru aprova tiha ona  rezolusaun Governu liuliu definisaun valór kompensasaun ka indemnizasaun ba komunidade afetadu ba planu konstrusaun sidade universitáriu Aileu,” Ministru Longuinhos dos Santos, informa ba Agência Tatoli iha Edifísiu Ministériu Finansas, kuarta ne’e.

Nia esplika katak rezolusaun Governu ne’e hetan ona aprovasaun hosi Konsellu Ministru no agora hein de’it atu realiza prosesu pagamentu ba komunidade afetadu ba konstrusaun sidade universitáriu Aileu.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here