Logo Expo Dubai 2020. Imajen/Espesiál

DILI, 14 juñu 2021 (TATOLI)—Juventude Fretilin husu Governu esplika Timor-Leste nia partisipaasaun iha Expo Dubai 2020 ne’ebé sei realiza iha loron 01 outubru 2021 to’o 31 marsu 2022, iha Emirat Árabe.

Notísia Relevante: PM defende partisipasaun iha Expo Dubai tanba investe tempu-rekursu

Portavós Juventude Fretilin, Zeferino da Silva, husu ba Governu liu-liu ba Ministru Turizmu, Komérsiu Industria no Prezidente Autoridade Nasionál Expo Dubai 2020, José Lucas da Silva, atu esplika didi’ak benefísiu saida mak Timor-Leste hakarak hetan hosi Expo Dubai ba impaktu ekonómia no sosiál iha tempu badak no tempu naruk ho ninia progresu no rezultadu.

“Juventude FRETILIN kontinua rejeita nafatin programa Expo Dubai iha post COVID-19 no husu Governu atu konsentra de’it ba Programa Governu no Planu Rekuperasaun Ekonómika hodi hatan problema sosiál no ekonómia ne’ebé povu Maubere hasoru hela, nune’e bele ajuda rezolve hikas bainhira ita tama ba era normál,” Zeferino da Silva hateten liuhosi komunikadu imprensa iha sede Comite Centrál Fretilin, Comoro, Dili, segunda ne’e.

Portavós ne’e hateten, juventude FRETILIN konsidera partisipasaun Timor-Leste nian iha Expo Dubai 2020 ne’e hanesan ba gasta de’it povu nia osan maibé povu barak mak sei ki’ak, má nutrisaun aumenta, bee-moos laiha no seluk tan.

“Ami husu ba Komisaun D Parlamentu Nasionál no Bankada Parlamentár sira atu debate urjénsia ho Ministru Koordenador Asuntu Ekonómiku,” nia dehan.

Juventude FRETILIN husu Governu hodi kria kampu serbisu ba joven sira hodi redús númeru dezempregu iha Timor-Leste.

Juventude Fretilin kontinua fó konfiansa tomak ba Primeiru-Ministru VIII Governu Konstitusionál, Taur Matan Ruak, maibé sira mós rejeita nafatin programa Expo Dubai 2020. 

Sira sente triste ho deklarasaun hosi Xefe Governu bainhira afirma Governu nia pozisaun ba Partisipasaun Timor-Leste nian iha Expo Dubai 2020, ho objetivu atu promove Timor-Leste nia identidade ba rai seluk.

Entretantu Sekretariu Jerál Juventude Fretilin, Efrém Trinquedos, hateten ba kestaun ida-ne’e juventude Fretilin sei haruka rekomendasaun ba Parlamenrtu Nasionál no ministériu relevante sira atu tau iha konsiderasaun.

Notísia Relevante: Orsamentu partisipasaun Timor-Leste ba Expo Dubai 70% hosi apoia externa

Jornalista: Domindos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here