Koordenadór Jerál Autoridade Nasionál ba Expo Dubai Timor-Leste (ANE-TL), Manuel Vong. Imajen TATOLI/Francisco Sony

DILI, 02 maiu 2021 (TATOLI)--Koordenadór Jerál Autoridade Nasionál Ba Expo Dubai Timor-Leste (ANE-TL), Manuel Vong, hateten, orsamentu partisipasaun Timor-Leste ba Expo Dubai maioria hosi apoia externa.

“Orsamentu ba atividade preparasaun Timor-Leste iha Expo Dubai hosi orsamentu 2021, ho totál millaun $1-resin (30%) no millaun $2-resin, ne’ebé ekivalente 70% hanesan apoiu hosi rai-li’ur, hosi nasaun Uni Emirat Árabe,” Manuel Vong, informa, hafoin hetan vizita hosi eis Primeiru-Ministru, Mari Alkatiri, iha Aitarak-laran, Dili, kuarta ne’e.

Espozisaun ne’e sei realiza iha loron 01 outubru 2021 to’o 31 marsu 2022, ne’ebé sei partisipa hosi nasaun 196.

Tuir nia, apoia finanseiru ba partisipasaun eventu mundiál ne’e, tanba haree Timor-Leste iha diplomasia ekonomia ho Estadu Uni Emirat Árabe di’ak, ne’ebé hanesan xave atubele promove nasaun ne’e ba mundu.

“Ita hetan fatin gratuita hanesan paviliaun, atu lori produtu sira bá Expo Dubai tanba nasaun Uni Emirat Árabe mak selu hotu tanba iha relasaun diplomátika di’ak,” nia akresenta.

Enkuantu, orsamentu hosi parte Timor-Leste, sei utiliza hodi halo preparasaun ba produtu lokál sira hodi lori ba Expo Dubai.

Notísia relevante: MTKI hakarak promove produtu orijinál Timor-Leste iha Expo Dubai

Autoridade Timor-Leste ba Expo Dubai estabelese hosi Ministériu Turizmu Komérsiu no Indústria (MTKI), durante fulan-ualu, hahú hosi 01 outubru 2020  to’o agora.

“Preparasaun faze dahuluk, ha’u bele dehan atinje ona 93%, tanba produtu sira ne’ebé atu lori bá, Ajénsia Bolorré atu ramata halo packing, ne’ebé tempu besik hatama ona ba kontatór tanba ema mak selu hotu,” nia hatutan.

Timor-Leste atu lori produtu sira fahe ba parte halo ezebisaun no komersiálizasaun.

Governu mak tau osan oituan liuhosi liña ministeriál, atu aprezenta produtu agrikultura, minerál, turizmu no marítima no aéreu iha ezebisaun.

Kona-ba produtu komersiál, Governu entrega ba setór privadu sira, hanesan empreza  kiik no média, atu lori rasik sira-nia sasán tau hamutuk ho kode produsaun, hafoin autoridade fasilita lori bá Expo Dubai.

Setembru 2021, ekipa hosi Timor-Leste dezloka

Iha fulan-setembru, ekipa hosi Timor-Leste sei dezloka ba fatin expozisaun hodi monta paviliaun.

“Kuandu ema sosa sasán karik, sira kontaktu direitamente ba empreza sira no osan empreza mak foti tanba Governu fasilita de’it atu haruka sasán,” nia hatutan.

Nune’e, Timor-Leste lori produtu hamutuk 50 resin hodi aprezenta iha expozisaun no ba komersializa hamutuk iha produtu 100 resin, ne’ebé kompostu hosi produtu agríkola, artezenatu, minerál no produtu tais.

“Ita laós lori ba fa’an de’it, maibé atu hatudu identidade tuir ita-nia kbiit, maibé ema kuandu sosa ne’e iha folin ona,” nia garante.

Iha loron 15 to’o 16 outubru, Timor-Leste sei realiza ‘bussiness forum’ hodi aprezenta setór haat hodi bele atrai investidór sira mai vizita no halo investimentu.

“Hahú hosi faze abertura to’o enseramentu, iha ajenda lubuk mak nakloke ba Timor-Leste atu bele partisipa liuhosi liña ministeriál ho área prinsipál haat mak ita hakarak fa’an hanesan turizmu, agrikultura, transporte lojíztika, petróleu no minerál,” nia esplika.

Timor-Leste mós sei envolve setór privadu sira ne’ebé investe ona atu garante ba investidór sira seluk katak investe iha nasaun ne’e seguru.

“Ita sei konvida investidór sira ne’ebé halo investimentu iha rai-laran, tantu iha transporte, turizmu, petróleu, agrikultura no seluk tan, atubele atrai investidór seluk mai investe iha ita-nia rai,” nia tenik.

Objetivu Timor-Leste partisipasaun Expo Dubai tanba hakarak  iha efeitu multipikadór, ne’ebé sei akontese iha setór turizmu, petróleu no minerál, agrikultura no seluk tan.

“Ha’u fi’ar katak akordu barak mak sei akontese iha Expo Dubai hodi benefisia Timor-Leste iha futuru. Tanba ita-nia moto mak ‘Lori Timor-Leste bá mundu no lori fali mundu mai Timor-Leste’, nune’e ita labele sai turizta iha ema-nia rai, maibé tenke kontráriu katak ema mak mai sai turizta iha ita-nia rai,” Manuel Vong afirma.

Nune’e mós, iha loron 18 outubru 2021, autoridade Expo Dubai iha Uni Emirat Árabe fó oportunidade ba Timor-Leste atu selebra loron nasionál.

“Ha’u sei halo selesaun ba ema ne’ebé bá Expo Dubai tenke iha kualidade no kompeténsia atu bele reprezenta Timor-Leste,” nia subliña.

Jornalista: Florêncio Miranda Ximenes

Editora: Julia Chatarina

1 KOMENTÁRIU

  1. Hapara estragia ba expo iha Dubai hodi hetan oportunidade seluk,fabor hare no rejolbe problema barak iha Rai laran:
    1.Povo halirik bee MOS ba nesesidade baziku Persija responde.
    2.Povo halirik bee ba Sira Nia Natar,hare atu mate ona.
    3.Povo halerik,balun sei Hela Lona okos.
    4.Povo hosu gastus OJE pertense Mai Ami Nia Moris Diak nee Mak Ida nebe’e.

HAKEREK NO HATÁN

Please enter your comment!
Please enter your name here