Primeiru-Ministru, Taur Matan Ruak. Imajen TATOLI/Egas Cristóvão

DILI, 10 juñu 2021 (TATOLI)--Primeiru-Ministru (PM), Taur Matan Ruak, defende partisipasaun Timor-Leste iha eventu internasionál Expo Dubai ne’ebé sei realiza iha loron 01 outubru 2021 to’o 31 marsu 2022, iha Uni Emirat Árabe, tanba investe ona tempu naruk ba preparasaun no rekursu.

“Prosesu ida-ne’e kleur, ha’u seidauk sai Primeiru-Ministru realiza ona enkontru dahuluk ne’ebé trata asuntu ne’e, ita investe tempu no rekursu ona, maibé derrepente to’o klaran ita hakotu ne’e oinsá. Tanba ne’e, tuir ha’u-nia hanoin laiha razaun atu ita hapara, entaun mantein prosesu ne’e, tanba buat ne’ebé ita la’o dook ona atu deside kansela ne’e susar,” PM hateten hafoin reuniaun semanál ho Xefe Estadu iha Palásiu Prezidénsial, Bairro Pite, kinta ne’e.

Notísia relevante: Orsamentu partisipasaun Timor-Leste ba Expo Dubai 70% hosi apoia externa

Xefe Governu konsidera partisipasaun iha atividade internasionál ne’e hanesan maneira ida promove Timór iha mundu.

“Normalmente partisipasaun iha asaun sira hanesan ne’e atu haree ba projesaun internasionál atu halo ema koñese ita-nia rain, tanba ne’e liuhosi Expo Dubai mak maneira ida halo mundu koñese di’ak liu Timór liuhosi produtu ne’ebé Timór iha,” Xefe Ezekutivu subliña.

Eis Prezidente Repúblika dehan, realidade sidadaun hosi rai barak seidauk koñese Timor-Leste, tanba ne’e liuhosi atividade internasionál ne’e bele promove liután.

Eventu internasionál ne’e sei partisipa hosi nasaun 196, ne’ebé sei iha expozisaun no komersializa produtu hosi nasaun ne’ebé partisipa.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here