Primeiru-Ministru, Taur Matan Ruak, no komitiva, ho ro-ahi KMP Tranship II, atraka iha Portu Beloi, Ataúro, sesta (11/06). Imajen TATOLI/Antónia Gusmão.

ATAÚRO, 11 juñu 2021 (TATOLI)Ró-ahi KMP Tranship II ne’ebé Governu Timor-Leste liuhosi Ministériu Transporte no Komunikasaun (MTK) kontrata hodi fasilita konetividade marítima, iha sesta ne’e tula Primeiru-Ministru (PM), Taur Matan Ruak ho komitiva ba postu Ataúro, maibé iha problema téknika balun halo susar atraka.

“La’ós pániku, maibé ha’u hanoin kapitaun ró ne’e foin iha nia vida lori Primeiru-Ministru karik, ha’u haree nia preokupa. Ne’e ba ema hotu, kuandu lori autoridade hanesan Primeiru-Ministru no Ministru, naturalmente preokupa entaun nia la’o kuidadu loos, maibé bá dahuluk ha’u agradese tanba kapitaun ne’e foun no ba dahuluk sira mai no komesa la’o maibé konsege halo buat hotu atu ita to’o ho seguransa di’ak,” PM hateten iha postu Ataúro.

Notísia relevante: PM Taur sei vizita Ataúro

Ro-ahi ne’e sai hosi Portu Dili, dadeer tuku 07:30 no to’o iha Ataúro kuaze tuku 12:00, maibé ró ne’e labele atraka tanba kestaun tékniku balun.

“Importante mak seguransa ema-nian no seguransa ita hotu nian, tanba ne’e mak ha’u agradese sira no Ministru Transporte no Komunikasaun tanba bele autoriza sira lori ha’u ho ekipa tomak,” nia akresenta.

Xefe Governu haree kondisaun ró-ahi ne’e rasik di’ak, tanba ró hotu halai iha tasi laran tenke iha kondisaun di’ak.

“Realidade Governu lori ró hosi rai seluk mak mai, maibé iha responsabilidade boot, nune’e mós Governu ninia responsabilidade, tanba karik iha problema ruma tenke asume responsabilidade,” nia fó hanoin.

Iha parte seluk, Xefe Ezekutivu seidauk hatene loloos razaun saida mak Komisaun Antí Korrupsaun (CAC, sigla portugés) suspende provizória operasaun ró-ahi KMP Tranship II.

“Ha’u seidauk hatene loloos, razaun saida mak CAC suspende, tanba Ministru Transporte no Komunikasaun hateten ona katak ró ne’e tuir regra hotu, tanba ne’e maka ha’u deside uza enkuantu laiha notifikasaun no la informa ba ha’u razaun saida mak tenke utiliza ró ne’e, tanba ita selu tiha para hela, Estadu lakon osan, sé ema ruma sala, entaun ema mak sala ró funsiona nafatin,” nia subliña.

Notísia relevante: CAC halo inspesaun ba ró-ahi KMP Tranship II

PM dehan, karik iha prosesu kontratu ró ne’e mosu sala ruma, ne’e responsabilidade individuál.

“Ema mak tenke ba hatán tanba ró la sala, tanba ró ne’e serví sosiedade, kuandu la halo operasaun atividade labele la’o,” nia hatutan.

Ró-Ahi ho destinasaun Dili-Ataúro, tula Xefe Governu ho espoza, akompaña mós hosi Ministru Administrasaun Estatál, Miguel Perreira de Carvalho, Vise-Ministru Interiór, António Armindo, Sekretaria Estadu Protesaun Sivíl, Joaquim Gusmão Martins, Komandante Jerál Polísia Nasionál Timor-Leste (PNTL), Komisáriu Faustino da Costa.

Tuir observasaun Agência TATOLI iha terrenu, nota katak pasajeiru sira sente preokupadu ho kondisaun ró ne’ebé labele atraka, maibé ho apoia hosi PNTL, Unidade Polísia Marítima ikus mai konsege bele rezolve no ró refere atraka ho kondisaun di’ak.

Tuir planu, ro-ahi KMP Tranship II temporáriamente sei opera entre Dili-Oé-cusse no Dili-Ataúro hodi hein ro-ahi Belin Nakroma no Success ne’ebé iha prosesu manutensaun.

Governu liuhosi MTK halo ona kontratu ho kompañia Atralata Estrategi hosi Indonézia hodi bele opera ró-ahi KMP Tranship II iha Timor-Leste.

Kontratu ho kompañia estranjeiru ne’e ba kada fulan $220.000, ho ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here