Ministru Transporte Komunikasaun, José Agostinho da Silva. Imajen TATOLI/Egas Cristóvão

DILI, 08 juñu 2021 (TATOLI)–Primeiru-Ministru (PM), Taur Matan Ruak, no ekipa sei hala’o vizita traballu ba postu administrativu Ataúro, munisípiu Dili durante loron rua.

“Ha’u simu ona pedidu ida hosi Primeiru-Ministru rasik nu’udar mós Ministru Interiór, inklui Komandante Jerál, Komisáriu Faustino da Costa ho komitiva ne’ebé sei hala’o vizita traballu ba Ataúro iha loron 11-12 juñu,” Ministru Transporte no Komunikasaun (MTK), José Agustinho da Silva, informa hafoin relata serbisu ba Xefe Governu iha Rezidénsia Farol, tersa ne’e.

Tanba ne’e, Ministru José Agustinho, orienta Autoridade Portuáriu Timor-Leste (APORTIL) no Diresaun Nasionál Marítima atu koordena no fasilita viajen traballu ne’e.

“Primeiru-Ministru hamutuk ho komitiva ba Ataúro utiliza ró-ahi KMP Tranship II, ha’u komprometidu viajen sei la’o di’ak,” nia akresenta.

Ró-ahi KMP Tranship II hosi Surabaya, Indonézia to’o iha Dili no atraka iha portu iha loron 25 maiu, hodi subtitui ró-ahi Berlin Nakroma no Success, ne’ebé atu halo manutensaun.

Governu liuhosi MTK halo kontratu ho kompañia estranjeiru hosi Indonézia hodi bele opera ró-ahi ne’e iha Timor-Leste, ne’ebé sei halo operasaun semana ida dala-ida, iha segunda ho destinasaun Oé-cusse-Dili-Ataúro no Dili-Oé-cusse-Ataúro

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here