PPN Aniceto Longuinhos Guterres, hato'o informasaun ba jornalista-sira kona-bá esnkontru ho Arsebispu Arkidioseze Metropolitana Dili, Mgr. Virgílio do Carmo da Silva, SDB, iha Cámara Eclesiástica, Lecidere, Dili, kinta (10/06). Imajen Tatoli/Arminda Fonseca

DILI, 10 juñu 2021 (TATOLI)-Prezidente Parlamentu Nasionál (PPN), Aniceto Longuinhos Guterres Lopes, kinta ne’e, hala’o reuniaun regulár ho Arsebispu Arkidioseze Metropolitana Dili, Mgr. Virgílio do Carmo da Silva, SDB, hodi  ko’alia kona-bá situasaun rai-laran no hato’o agradesimentu ba igreja-nia kolaborasaun di’ak ba iha prosesu alterasaun  Lei Migrasaun ho Azilu.

Notísia Relevante : Alterasaun lei migrasaun-azilu fó tratamentu espesiál ba misionáriu Katólika estranjeiru

Aniceto Guterres, informa ba jornalista-sira katak enkontru ne’e hanesan kontinuasaun  enkontru ho Arsebispu antes Dili aplika serka sanitária no konfinamentu obrigatóriu, tanba antes ne’e iha tiha ona kompromisu ho Arsebispu atu halo enkontru regular, maibé tanba situasaun, ohin foin realiza fali enkontru ne’e.

“Ohin,  oportunidade mós ba ami hato’o agradesimentu ba igreja katólika ne’ebé fó nia kolaborasaun di’ak ba iha prosesu alterasaun ba Lei Migrasaun no Azilu ne’ebé kontein asuntu importante ba misionáriu sira-nia vistu. Lei ne’e aprova tiha ona no Prezidente Repúblika mós promulga tiha ona, ita hein semana ida ne’e nia-laran públika ona iha Jornál Repúblika,” Aniceto Longuinhos Guterres Lopes, informa hafoin enkontru ho Dom Virgílio do Carmo da Silva, SDB iha Cámara Eclesiástica, Lecidere, Dili.

Notísia Relevante : PN aprova ona alterasaun dahuluk ba lei migrasaun-azilu

Nia afirma, tanba votasaun finál globál Projetu-lei 25/V/ (3a kona-bá alterasaun dahuluk lei númeru 11/2017, 24 maiu (Lei Migrasaun no Azilu). Projetu-rezolusaun ne’e altera ho rezultadu votasaun a-favór 42, abstensaun 0 no kontra tolu (3).

“Lei iha ona, implementasaun ne’e kabe ba Governu. Governu tenke sosializa hodi esklarese didi’ak  lei ne’e ninia implementasaun, rekizitu ne’e saida, ida ne’e mak ami ko’alia, maibé hanesan implementadór klaru tenke sosializa uluk lei sira-ne’e mai iha instituisaun sira, liuliu kona-bá vistu estadia ne’e ba misionáriu-sira,” Aniceto Guterres esplika.

Kona-ba misionáriu katólika-sira atu tama Timor-Leste uza rekizitu saida de’it, PPN Aniceto Guterres, husu públiku akompaña de’it bainhira Jornál Repúblika publika ona tanba  buat hotu sei fó sai iha jornál refere.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here